भांगरभूंय | प्रतिनिधी
वास्को, प्रतिनिधी ः मुरगांव तालुका अंमलबजावणी पंगडान सडा हांगा सिगरेट आनी हेर तंबाखू उत्पादन कायदो 2003 (कोटपा) उल्लंघन केल्ल्यान धा जाणांचेर कारवाय करतना 2 हजार रुपया दंड एकठांय केलो. धा मदल्या आठ जाणांनी कलम (4) आनी दोग जाणांनी कलम (6) चें उल्लंघन केल्लें. हातूंत वेगवेगळ्या आस्थापनांचे कार्यालय, सुपरमार्केट, रेस्टॉरंट, गेस्ट हावस आदींचो आस्पाव आसा.
मुरगांवचे संयुक्त मामलेदार गजेश शिरोडकार हांच्या फुडारपणा खाला उल्लेख केल्ल्या पंगडान वेगवेगळ्या सुवातींची पळोवणी केली. ह्या पंगडांत गोंय कॅनचे समन्वयक रोलंड मार्टिन्स, मुरगांव मामलेदार कार्यालयाचो सर्कल निरिक्षक हनुमंत मांद्रेकार, तलाठी जीतेंद्र कामत, वास्को शार भलायकी केंद्राचे दक्षता कर्मचारी चंद्रशेखर देसाय, मुरगांव पुलीस स्टेशनाचे उपनिरिक्षक उदय साळुंके हांचो आस्पाव आशिल्लो.
तपासणे वेळार कांय आस्थापनांनी कोटपा खाला ‘नो स्मोकिंग’ हें बोर्ड सारकें लावंक नाशिल्ल्याचें दिसून आयलें. भारतीय अन्न सुरक्षा आनी मानक प्राधिकरणाची नोंदणी प्रमाणपत्र लावंक नाशिल्ली. ह्या चवकशेचो अहवाल कोटपाचे जिल्हो पांवड्यावेले समन्वय समितीचे बसकेंत दक्षिण गोंयचो जिल्हाधिकारी आश्विन चंद्रू आनी वांगडी सचीव डॉ. साराह जॉर्ज दितले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
