भांगरभूंय | प्रतिनिधी
पेडणें: गोंय शिमेंत महाराष्ट्रांतले पुलीस येवन नाकाबंदी करतात आनी येवपी वचपी वाहनांची खरपणान तपासणी करत आशिल्ल्याचें चित्र दिसून आयलें. पूण पेडणें पुलीस तपासणी करीत आशिल्ल्याचें दिसून येनाशिल्लें.
पत्रादेवी चेक नाक्या वेल्यान व्हड प्रमाणांत सोऱ्याची तस्करी जायत आशिल्ल्याच्यो खूबशो कागाळी आयिल्ल्यो. तेच फाटभुंयेर महाराष्ट्र पुलिसांनी थेट पत्रादेवी गोंयचे शिमेंत जे सुवातेर मोपा शिमेंत पत्रादेवी पुलीस चेक नाको आसा थंय सिंधुदुर्ग पुलीस व्हड प्रमाणांत येवन गोंय सावन महाराष्ट्रांत वचपी वाहनांची खरपणान तपासणी करीत आशिल्ल्याचें चित्र 18 वेर सांजवेळा सावन रातभर दिसून आयलें.
हे विशीं महाराष्ट्र पुलीस निरिक्षक पवार हांचे कडेन संपर्क सादलो तेन्ना गोंय आनी महाराष्ट्र पुलिसांचे बरे संबंद उरचे हे खातीर जोड रितीन ही मोहीम राबयतात. वेळ प्रसंगार गोंयचे पुलीस महाराष्ट्र शिमेंत येवन लेगीत महाराष्ट्रांतलीं वाहनां गोंयांत वचत आसली आनी एखाद्या वेळार दुबाव आयिल्लो आसत जाल्यार ते लेगीत अशे तरेची तपासणी करूंक शकतात अशें तांणी म्हणलें.
फाटल्या कितल्याशाच म्हयन्या सावन गोंय सावन महाराष्ट्रांत व्हड प्रमाणांत सोऱ्याची विक्री जाताली. पत्रादेवी चेक नाक्यार न सांपडपी वाहनां थेट सिंधुदुर्ग बांदा इन्सुली आरोस ह्या वाठारांत आणायतले. आनी लाखांनी रुपयांचो सोरो जप्त करपाची प्रक्रिया महाराष्ट्र पुलीस करताले. पूण पेडणें अबकारी विभागा कडल्यान अशे तरेची कारवाय कित्या जायनाशिल्ली असो प्रस्न आतां लोक उपस्थीत करूंक लागल्यात. तेच फाटभुंयेर महाराष्ट्र पुलिसांनी गोंयचे शिमेंत येवन फाटल्या तीन दिसां सावन ही नाकाबंदी सुरू केल्या. फक्त दुचाकीच न्हय जाल्यार दरेक वाहनांत कितें आसा, कागदपत्रां आसात काय ना, त्या वाहन चालका कडेन परवानो आसा काय ना हाची लेगीत खर तपासणी जायत आशिल्ल्याचें चित्र 18 वेर पत्रादेवी नाक्यार भेट दिली तेन्ना दिसून आयलें.
महाराष्ट्र पुलीस आनी पत्रादेवी नाक्यार जे पद्दतीन नाकाबंदी जाताली आनी दरेक वाहनांची तपासणी करताले हे फाटभुंयेर चेक नाक्यार गोंयच्या पुलिसांक मात थोडो विसव मेळ्ळो. नाक्यार येवचे पयलींच जे सुवातेर पुलीस नाको आसा थंय सिंधुदुर्ग पुलीस आपल्या पंगडा सयत सज्ज आशिल्ले. आनी ते सुवातेर सगलीं वाहनां तपासताले. ताका लागून अबकारी नाक्यार वाहनां तपासपाची गरज पडली ना.
गोंय पुलिसांचेर दुबाव बी आसा काय कितें, ते खातीर महाराष्ट्र पुलिसांक गोंयचे शिमेंत येवन नाकाबंदी आनी तपासणी करची पडटा अशें विचारलें तेन्ना, दर कांय दिसांनी अशी मोहीम राबयतात अशें महाराष्ट्र पुलिसांनी सांगलें.
ही मोहीम गोंयांत येवन राबयतात ते विशीं मोपा विमानतळ पुलीस स्टेशन शिमेंत येवपी पुलीस निरिक्षक निनाद देवूलकार हांचे कडेन संपर्क सादलो तेन्ना तांचो फोन आवट ऑफ रेंज येतालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
