भांगरभूंय | प्रतिनिधी
मडगांव, प्रतिनिधी: मंत्री निलेश काब्राल हांणी राजिनामो दिल्या उपरांत आयतारा सांजवेळार नुवेंचे आमदार ऍलेक्स सिक्वेरा हांची मंत्री म्हणून नेमणूक जातली. हे फाटभुंयेर मडगांवचे आमदार दिगंबर कामत हांणी सिक्वेरा हांची भेट दिली. त्या वेळार सिक्वेरा हांणी कामत हांकां वेंग मारून ‘थँक यू’ म्हणलें.
बांदकाम मंत्री काब्राल हांणी राजिनामो दिलो. एक वर्स आदीं कॉंग्रेसींतल्यान भाजपांत आयिल्ले नुवेंचे आमदार आलेक्स सिक्वेरा काब्राल हांचे सुवातेर येतात.
कॉंग्रेसीचे तिकेटीचेर जैतिवंत जाल्ले आमदार दिगंबर कामत हांचे सयत आठ जाण भाजपांत आयिल्ले. आठ आमदार भाजपांत आयले उपरांत एक वर्स जालें तरी ह्या मदल्या एकाय आमदाराक मंत्रीमंडळांत संद मेळूंक ना. कांय जाणांक म्हामंडळांत संद मेळ्ळी. आतां बांदकाम मंत्री काब्राल हांणी पक्ष फुडार्यांच्या आदेशा प्रमाण राजिनामो दिल्ल्यान आयतारा सांजवेळार सिक्वेरा हे सोपूत घेतले.
कामत सिक्वेरा हांका मेळ्ळे तेन्ना तांणी, कॉंग्रेसींतल्यान भाजपांत येतना राज्याची परिस्थिती वेगळी आशिल्ली. राज्याच्या बर्या खातीर पक्ष बदलचो पडलो. कोणेय टिका केल्यार तो पेंज आपूण घेना. आमी कितें तें आमकां आनी जनतेक खबर आसा. सेक्वेराक मंत्रीपद मेळपाक कळाव लागलो तरी ताका मंत्रीपद मेळटा हाची खोस भोगता अशें तांणी सांगलें.
भाजपांत प्रवेश करतना कसलेच तरेच्या आस्वासनाचेर करूंक नाशिल्लो. हें पयलें पावल. फुडें कितें जातलें तें पळोवया अशें सेक्वेरा हांणी सांगून फुडें आनीक कांय बदल जातले असो संकेत दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
