भांगरभूंय | प्रतिनिधी
मुख्यमंत्र्यांची घोशणा, राज्यभरांतल्या पंचायत मंडळांक निर्देश
पणजी : परंपरीक हस्तकारागिरांक प्रधानमंत्री विश्वकर्मा येवजणेचो लाव मेळचो, हे खातीर लाबार्थ्यांक बेगिनूच विभक्त (स्प्लिट) रेशनकार्ड दितले, अशी म्हायती मुख्यमंत्री डॉ. प्रमोद सावंत हांणी दिली.
एकत्रीत कुटुंब पद्दतीक लागून कुटुंबांतली एकादी व्यक्ती सरकारी नोकरेंत आसत जाल्यार ताच्या भावाक हे येवजणेचो लाव मेळना. हीच अडचण सोडोवपाक सरकारान तसो निर्णय घेतला, अशें मुख्यमंत्र्यांनी सांगलें.
राज्यांतल्या थळाव्या लोकप्रतिनिधीं मदीं हे येवजणे विशीं मुख्यमंत्र्यांनी जागृताय केली. ह्या वेळार नियोजन आनी सांख्यिकी खात्याचे संचालक विजय सक्सेना, पंचायत संचालक सिद्धी हळर्णकार, अरविंद बुगडे आनी राज्यभरांतले पंच, सरपंच, नगरसेवक, आदले खासदार नरेद्र सावयकार हजर आशिल्ले.
प्रधानमंत्री विश्वकर्मा येवजणे खाला परंपरीक 18 प्रकारच्या हस्तकला कारागिरांक उण्या कळंतरान 1 ते 2 लाख रुपयांचें रीण दितले. जायते खेपे एकत्रीत कुटुंब पद्दतीत एकाच रेशन कार्डाचेर सगल्यांचीं नांवां आसतात. एका भावाचो चलो सरकारी नोकरेंत आसता आनी दुसरो भाव परंपरीक वेवसाय करता जाल्यार ताका तो वेवसाय येवजणे खातीर पात्र थारना. तांकां हे येवजणेचो फायदो मेळचो म्हूण तांचे कडेन स्वतंत्र रेशनकार्ड आसप गरजेचें. हे खातीरूच आमी अशा लाबार्थ्यांक बेगिनूच विभक्त रेशनकार्ड दितले, अशें मुख्यमंत्र्यांनी सांगलें.
येवजणेच्या पयल्या टप्प्यांत 18 परंपरीक कारागिरांचो आस्पाव आसा. हातूंत सुतार, लोहार, सोनार, कुंभार, मूर्तीकार, चांभार, धोबी, न्हावी, शिंपी, विणकार, परंपरीक बावल्यो तयार करपी, मिस्त्री, फुलांचे हार तयार करपी, नुस्तेमाऱ्या खातीर जाळ तयार करप्यांचो आस्पाव आसा. हे येवजणे खातीर सुमार 13 हजार कोटींचो खर्च अपेक्षीत आसा. थळाव्या पांवड्या वयल्या लोकप्रतिनिधींनी आपल्या वाठारांतल्या कारागिरांची हे येवजणे खातीर नोंदणी करची, अशें आवाहन मुख्यमंत्र्यांनी केलां.
विभक्त रेशनकार्डा खातीर अर्ज
विभक्त रेशनकार्ड करपाचे आसल्यार संबंदिताक एक अर्ज आनी जाच्या नांवार रेशनकार्ड आसा ताचे ‘हरकत ना प्रमाणपत्र’ सादर करचे पडटले. कांय व्यक्तींचे उत्पन्न पांच लाखां परस चड आशिल्ल्यान रेशनकार्ड रद्द केलां. अशा लोकांक आमी नवीन रेशनकार्ड दितले. ते खातीर तांणी पोरणें रेशनकार्ड घेवन ही प्रक्रिया पुराय करप गरजेचें. ह्या व्यक्तींक नवीन रेशनकार्ड दितले, पूण ताचेर धान्य मेळचे ना, अशें मुख्यमंत्री डॉ. प्रमोद सावंत हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
