भांगरभूंय | प्रतिनिधी
पर्यटकांक त्या थळाची जीणभर म्होवाळ याद उरपाक जाय. हें काम सरकारान न्हय, तर लोकांनी करपाचें.
उत्तर भारतांतल्या धर्मीक थळाचेर पांय दवरले काय थंयचे पंडे धांवत येतात. थंयच्या रेल्वे स्टेशन, बसस्टॅण्डाचेरुय असोच अणभव येता. आतां गोंयांतूय हो प्रकार सुरू जाला. आज न्हय, तर कांय वर्सां पयलीं सावन. तातूंतले कांय जाण तर पर्यटकांक लुट्टात. पुलीस केशीय जाल्यात. बशींतल्यान पर्यटक देंवतकच वासपूस केली, टॅक्सी, हाॅटेल जाय, इतलें विचारल्यार समजू येता, पूण तो नाका नाका म्हणटना, ताचे फाटल्यानूच लागप चुकीचें! पर्यटक हो अतिथी… आनी सोयरो हो देवा सारको आसता, हें विसरूंक जायना. ती आमची संस्कृताय. पणजेच्या कदंब बसस्टॅण्ड वाठारात काल 10 दलालांक धरले. तांचे आड पर्यटकांनी कागाळी केल्ल्यो. ते खंय हाॅटेल, टॅक्सी आनी हेर सेवां खातीर बळयां तांच्या फाटल्यान लागिल्ले. ह्या दलालांक लागून गोंयचें नांव बदनाम जाता…. आनी ते चडशे भायले. पुलिसांनी नेमान राज्यभर अशे तरेची मोहीम नेमान चालीक लावंक जाय. कारण
पर्यटक फक्त पयसो हाडिनात, तर ते आपली संस्कृताय, इश्टागत, विस्वास घेवन येतात. अतिथी देवो भव ही आमचे संस्कृतायेची वळख. हांसऱ्या मुखामळान येवकार दिवप हें दरेकल्याचें कर्तव्य. पर्यटकांक त्या थळाची जीणभर म्होवाळ याद उरपाक जाय. हें काम सरकारान न्हय, तर लोकांनी करपाचें. म्हणल्यार वेवसायिकांनी! अतिथीचो आदर करता तोच समाज संवसारांत आदर मेळयता. ताकाच लागून पर्यटन थळ आशिल्ल्या तालुक्यांत गुन्यांव जावंक जायना. पर्यटन थळाचेर तर कांयच वायट जावंक जायना. कारण एकदां खत लागलें काय तें कितलेंय धुंवलें म्हूण वचना. टाव्ट्स, दलाल, एजंटांचो गोंयांत सगले कडेन सुळसुळाट जाला. तांचो उपद्रवूय वाडला. पणजे थोड्यांत ताब्यांत घेतले, ही कारवाय पर्यटक सुरक्षीत आसात, असो संदेश दिवपी. दर्यावेळांचेर दलाल आनी खंडणी बहाद्दर आसात. तांचेर कायमचो आळाबंद येतलो?
चडशे दलाल हे अधिकृत नासतात. शॅक्स, टॅक्सी वा उदका खेळ वेवसायिकां कडल्यान कमिशनाचेर तांची नेमणूक जाता. कांय जाण पर्यटकाक योग्य जाग्यार पावोवन तांचे कडल्यान स्वताच कमिशन घेतात. थोडे गुन्यांवकारी पद्दतीन पर्यटकांक फटयतात. गोंयांत पसून असले प्रकार घडल्यात. हे दलाल भायले, मात नांव बदनाम जालें गोंयकारांचें! जबरदस्तीन फाटल्यान लागून टॅक्सी, हाॅटेलाचो पत्तो दिवप, सवाय रुमाचें हांयस दाखोवन फटोवप, बनावट बुकिंग, विदेश पर्यटकां कडल्यान चड पयशे घेवप, पर्यटकाक रुमांत व्हरून पयशे लुटप असले प्रकार घडल्यात. हाका लागून पर्यटक राज्या विशीं न्हयकारात्मक अणभव घेवन परत वतात. 100 पर्यटकांक हो अणभव आयलो जाल्यार तातूंतले 50 जाण तरी तो सोशल मिडियाचेर घालतात. शेजाऱ्यांक, सोयऱ्यांक सांगतात. म्हणटकच गोंयची कितली बदनामी जाली, तें दरेकल्यान थारावचें. लोकसंख्या चड आशिल्ल्यान पर्यटकांची संख्या उणी जायना, पूण ही बदनामी स्लो पाॅयझनिंगा सारकी राज्याचे कुडींत पातळत रावता. हाचो धपको प्रामाणीक वेवसायिकांक बसता. कारण नासतना बदनाम जातात.
दलाली बंद करपाक डिजीटल नोंदणी आनी सेवा बरी. मात गोंयांत अॅपाचेर टॅक्सी चलोवपा विशीं वाद आसात. सीसीटीव्ही, पुलीस बंदोबस्त वाडूंक जाय. प्रत्येक कडेन भोवभाशीक सुचोवणी तक्टे लावचे. पर्यटकानूय गोंयांत येवचे पयलीं बारीकसारीक म्हायती वाचूंक जाय. चड पर्यटक येतात थंय तांकां टॅक्सी, हाॅटेलां विशीं म्हायती दिवपी एक विभाग जाय. तोय बी बस उबी रावता थंय. पर्यटकां कडेन कशें वागप हाचें प्रशिक्षण दिवप गरजेचें. जर कोणे मस्ती केलीच तर ताचेर बेगोबेग कडक कारवाय जावंक जाय. गोंयांत तरी हें करचेंच पडटलें, कारण आमी पर्यटकांचेर अवलंबून आसात. निदान सध्या तरी!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
