भांगरभूंय | प्रतिनिधी
पाटणा, खबरां संस्था : बिहारचे मुख्यमंत्री नितीश कुमार हांणी काल विधानसभेत लोकसंख्या नियंत्रणा खातीर चलयांच्या शिक्षणाची गरज आसा हें सांगतना वादग्रस्त वक्तव्य केल्लें. उपरांत विरोधकांनी ताका आक्षेप घेत खर टिका केल्ली. हें वक्तव्य बायलांचो अपमान करपी आशिल्ल्याचेंय म्हणिल्लें. काल सोशल मिडियाचेरुय लाखांनी लोकांनी ताचेर टिका केल्ली. आतां नितीश कुमार हांणी माफी मागल्या.
पत्रकारां कडेन आयज उलयतना नितीश कुमार हांणी सांगलें, “म्हज्या वक्तव्याचेर खूब टिका जाता. हांव जर कितें चुकीचो उलयलां जाल्यार माफी मागतां. म्हजीं उतरां फाटीं घेता. म्हजेर टिका करप्यांक हांव येवकार दितां. ”
कितें म्हणलें तांणी?
नितीश कुमार हांच्या वक्तव्या उपरांत बायलां आमदारांनी लजेन सकयल मान घाली, तर दादले आमदार मुमुरखेच हांसले. अर्थीक परिस्थितीचो तपशील दिवपी जात सर्व्हे अहवाल जाहीर केले उपरांत तांणी हें वक्तव्य केलें.
‘चली शिकूंक ना, तिणें लग्न केलें तर दादले सद्दां रातचे संबंद दवरतात. ताका लागून भुरगें जल्माक येता. पूण, चली साक्षर आसल्यार प्रजनन दर देंवता. चली सुशिक्षीत आसल्यार तो सरासरी २ टक्क्यां मेरेन सकयल येता. आनी जर ती चड शिकली जाल्यार प्रजनन दर राष्ट्रीय पांवड्याचेर १.७ टक्क्यां मेरेन सकयल येता. ताका लागून चलयांनी खूब शिकपाक जाय.’
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
