भांगरभूंय | प्रतिनिधी
मडगांव, प्रतिनिधी: कॉस्ता फॅक्टरीच्या फाटल्यान आशिल्ले कोयराचे राशीक उजो पेटिल्ल्याची घडणूक शेनवारा रातची घडली. उजो पालोवपी दळाच्या जवानांनी ह्या उज्यार नियंत्रण हाडलें. उपरांत पालिकेक हे विशीं थळाव्या नागरिकांनी सांगून लेगीत हो कोयर उखलप जायना. ह्या सप्तका भितर हाचेर जर कारवाय जावंक ना जाल्यार नागरीकूच फुडली भुमिका घेतले अशी शिटकावणी थळाव्यांनी दिल्या.
उजो पालोवपी दळा कडल्यान मेळिल्ले म्हायती प्रमाण, शेनवारा रातच्या 7 वरांचेर आकेंच्या कॉस्ता फॅक्टरीच्या फाटल्या भागांत आशिल्ल्या मैदानाच्या कुशीकच्या कोयराचे राशीक उजो लागलो. नाल्ल्याचीं सोण्णां, तशेंच हॉटेलांतलो कोयर असो मिस्तुराद कोयर थंय आशिल्लो. उदक मारले उपरांतूच ह्या उज्याचेर नियंत्रण मेळोवप शक्य जाल्ल्याचें उजो पालोवपी दळाच्या जवानांनी सांगलें.
थळावे प्रभव नायक हांणी, फॅब्रिका मैदानाच्या लागसारा कोयराच्यो राशी आसात. ह्या कोयराक सकाळीं कोणी तरी उजो घातलो. खुबश्या नागरिकांचे फोन आयल्या उपरांत रोखडेंच उजो पालोवपी दळाक म्हायती दिली.
तांच्या जवानांनी येवन उजो पालयलो. ह्या मैदानाचेर खुबशे जाणा खेळपा खातीर येतात. वॉकींगाक येता. तांकां ह्या कोयराचो त्रास जाता. स म्हयन्यां सावन हो कोयर हांगा पडून आसा. कोयर उखलपी निरीक्षकांक आपयल्ले. पूण तांणीय ह्या कोयराची जापसालदारकी घेवंक ना. मडगांव पालिकेन ह्या कोयराचो बेगीन विलो लावचो. हो कोयर दिसान दीस वाडतूच आसा. सप्तका भितर हो कोयर उखलूंक ना जाल्यार ह्यान फुडें कितें भुमिका घेवची हें थळावे थारायतले, अशी शिटकावणी तांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
