भांगरभूंय | प्रतिनिधी
लोकसभा वेंचणूक लागीं येतना गोंयांत 37 वी राष्ट्रीय खेळां सर्त चालू आसा. शिंयाळो रुतू सवकासायेन दंवाची चादर पांगरून धरतरेक थंडसाण दिवपाक लागला. जात्रा, फेस्तां, महोत्सव, उत्सवांचे हे दीस. उपाट गर्दी कार्यावळीं कडेन जातना राज्याच्या प्रशासनान सादूर रावपाची शिटकावणी दिवंक ना. मात तुमी आमी भौशीक सुवातींनी चलता भोंवतना जतनाय घेवया, वांगडच्यांक, सोयऱ्यांक शिस्तीची जाणवीकाय करून दिवया.
गोंय 365 दिसां वांगडा खेळांतय अतिथी देवो भव जावंक शकता अशें सांगपी आसात. पर्यटकांक वेगळे वाटेन व्हरपाक वेवसायिकांनी आडमेळीं हाडचे परस वेवसायाक शिस्त लायल्यार, पर्यटकांच्यो वेगळ्यो वाटो आपणायल्यार वेवसाय तिगतलो.
नितळसाण, कायदो पाळप, हेरां बराबर आपूण रावप, नवें कितें तें समजून घेवप, अतिथी देवो म्हणप पर्यटन फायदो मेळोवन दिवपी. पर्यटकांक नवे सुवातींनी व्हरपाक नव्यो साधनसुविधा उबारतना सैम सांगात, विसव आनी मनरिजवणेची वेवस्था आसच्यो. दर्यादेगो पर्यटकांकच न्हय थळाव्यांकय भावतात पूण त्यो जेन्ना म्हेळ्यो जातात, आदलें रूप ना जाता तेन्ना महोत्सव, उत्सव, खेळ, परिशद पर्यटनाचो आदार घेवपाक जाय. पर्यटन गांवगिऱ्या वाठारां खातीर व्हरपाक मुळाव्या साधनसुविधांची निर्मणी जावची. पिवपाचें उदक, चलपाची वाट, हात-पांय धुवप, टॉयलेट आनी बाथरूम फाव ते प्रमाणांत नवे पद्धतीन जावं येतात.
राष्ट्रीय खेळां सर्ती खातीर केल्ल्या साधनसुविधांचो उपेग पर्यटना खातीर करपा पासत येवजण जाय. वेवसायांतल्या उद्येजकांचे मजतीन ती करून तांच्याच आदारान चालीक लायल्यार सरकाराचो भार ल्हव जातलो. गोंय म्हणल्यार सवाय सोरो, मेकळेपण, रस्त्यारय खंयच्याय वेळार नाचपाक खेळपाक, रांदपाक, पेंवपाक मेळटा हे समज पयसावपाचो वावर पर्यटन खात्यान करचो. म्हत्वाच्यो सुचोवण्यो, कायद्याची माहिती मोबायल अॅलर्टांतल्यान दिवन गोंय म्हणल्यार शांतीकायेचें थळ, तंटे नाकात, थळाव्या कायद्यांक पाळो दियात अशी जागृताय मोबायल अॅपा वयल्यान जावची. हेर राज्यां ड्रॅस कोड आपणावपाचे दिकेन वतात, गोंयांतय इगर्जी, देवळांनी ड्रेस कोडा खातीर पावल घालां. पर्यटकांक तें आदींच कळयल्यार सुदारणां जातलीं.
उंचेले अधिकार मेळोवपी अस्तुरी पर्यटनाक, बसकांक, परिशदांक एकली गोंयांत येता वता तेन्ना तिका गोंय आपलें, राखण दिवपी दिसचें.
राष्ट्रीय खेळां सर्तीचे तकटे इंग्लिशींतल्यान, राष्ट्रभाशेचो, राजभाशेचो वासय तांकां ना. इफ्फी, पर्पल फेस्त, लोकोत्सव, सेरेंडिपीटी उत्सव, महोत्सवांत राजभाशा, राष्ट्रभाशेंतल्यान अचूक मार्गदर्शन करपी तकटे हे फुडें आसचे. माहिती, राजभाशा संचालनालयाक उत्सवांत, पर्यटनांतय ओडून व्हरचें पडटलें.
पणजेचेर, शारांतल्या सुविधांचेर फेस्तां, उत्सवांचें चेपण पडटा. खेळां सर्ती हेर शारांनी जाल्यात, गांवगिऱ्या वाठारांतय महोत्सव, सर्तीं पासत साधनसुविधा पणजेंतल्या खेळां गांवां वरी जाल्यार? कोण ह्या गांवाचो शिल्पकार? पर्यटन, महोत्सवाचो लाव शारां वांगडा गांवांतल्या लोकांकय मेळपा खातीर सरकारान थळाव्या भागिदारां मुखार येवजणी मांडच्यो, तांच्या सुचोवण्यांक कोनसो मेळ्ळ्यार तंटे, आंदोलनां, झगडीं जायनात.
याद जाता कोंकण रेल्वे आंदोलनाची, आंदोलनांतल्यान कोंकण रेल्वे खातीर म्हयनोभर ओझा आयोगाची सुनावणी जाली. पत्रकारांक दीसभर सुनावणेक हजेरी लावपाक मेळटाली, पंदरा-वीस दीस हेडलायनी दिवपाची संद आमकां मेळ्ळी, खबर आमी दिली, निमणो निर्णय संपादप्यांचो खबरेकारान दिल्ले बातमेचेर हात भोंवडावप, संस्कार करप मोटो वावर.
भोवमाध्यमी युगांत एक ल्हान शॉर्टस दिवप त्रासाचे जातात तेन्ना अणभवाक म्हत्व मेळटा. आपल्या लिखाणांतल्यान अणभवाचें गिन्यान वाचप्यां मेरेन पावल्यार वाचपी बातमीदार जातात. तांकांय उतरांची सर्कस करपाचें प्रशिक्षण मेळपाक जाय.
एक वाचपीय भोवमाध्यमी युगा खातीर मोलादीक पूण वाचप्याकय सत, फट समजुपाची तांक आसप गरजेचें. भोवमाध्यमी युग सरकारी कार्यावळी, येवजण्यो गोंय सोयऱ्यां मेरेन पावोवपाक उपेगाचें. ह्या युगाक येवकार दितना युगांतलें बरें वायट जाणा जावन घेवचें पडटलें, वाचप्यांचो विश्वासय जोडचो पडटलो. पर्यटकांक, थळाव्यांक आपल्यो अडचणी मांडपाक भोवमाध्यमां वावुरतात तेन्ना तांकांय अचूक माहिती, खंय कितें घडलां पांच-स उतरांनी सांगपाक येवपाक जाय. फोटोग्राफरांनी फोटो खाला कॅप्शन दितना नांव, गांव, वाडो, मार्ग पळोवचो. पणजी फोडल्या, तोडल्या तरी मोगा, मोगा म्हणत पेंवता, धांवता, खेळटा ती कशी? पणजेंत फोडप, तोडप खंयच्या मार्गार जालां, थंय वचपाक वाट आसा? खंयच्यो खाणां-जेवणांच्यो सदच्यो सुवाती, दुकानां बंद आसात? दुसऱ्यो वाटो आसात? हे अतिथी देवो भव म्हणटना सांगचें. खेळांतय मुखेल प्रवाहांतले पत्रकार आसतात. खेळांगणांतल्यान, न्यायालयांतल्यान मुखेल प्रवाहांत अदीं मदीं येवपाकय अणभवच उपेगाचो. अणभवांतल्यान खूब शिकपाक मेळटा तरी भोवमाध्यमाक योग्य, उंचेले तांकीचें शिक्षण आसप गरजेचें.
सुहासिनी प्रभुगांवकार
9881099260
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
