भांगरभूंय | प्रतिनिधी
मडगांव, प्रतिनिधी : महाराष्ट्रांतल्या विधानसभा अध्यक्षांक थारावीक वेळार आमदार अपात्रताय याचिकेचेर सुनावणी करपाचे निर्देश सर्वोच्च न्यायालयान दिल्यात. गोंयचे याचिकाकर्ता गिरीश चोडणकार सर्वोच्च न्यायालयांत गेल्यार अशेच तरेन विहीत वेळार निकाल दिवपाचे निर्देश मेळपाक शकतात, अशें मत आमदार विजय सरदेसाय हांणी उक्तायलें.
सभापती रमेश तवडकार हांणी चोडणकार हांणी दाखल केल्ल्या पक्ष बदलपी कॉंग्रेस आमदारांक अपात्र थारोवपाचे याचीकेचेर निकाल दिवपा खातीर आपल्याक वेळाचें बंधन ना अशें म्हणिल्लें. हे विशीं उलयतना आमदार सरदेसाय हांणी, महाराष्ट्रांतले विधानसभा अध्यक्ष राहुल नार्वेंकार हांकां सर्वोच्च न्यायालया कडल्यान शिवसेना आनी राष्ट्रवादी कॉंग्रेस हांच्या आमदारांचे अपात्रतेचे याचिकेचेर थारावीक कालमर्यादेंत निकाल दिवपाचे निर्देश दिल्यात. महाराष्ट्रांतल्या सभापतीं कडल्यान वेळ काडून धोरणाची अंमलबजावणी करपाक अपेस आयिल्ल्यान सर्वोच्च न्यायालयांत गेले आनी थारावीकूच वेळांत सुनावणेचे निर्देश आयले. महाराष्ट्र आनी गोंयचे अपात्रतेची फाटभूंय ही एकसारकी आसा. गिरीश चोडणकार हांणी उच्च न्यायालयांत कॉंग्रेस आमदारांक अपात्र थारपाची याचिका दाखल केल्या. चोडणकार हांणी सर्वोच्च न्यायालयांत गेल्ल्यान न्यायालयान अशे तरेन थारावीक वेळार सुनावणी पुराय करीत निकाल दिवपाचे निर्देश दिवपाक शकतात अशेंय सरदेसाय हांणी म्हणलें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
