भांगरभूंय | प्रतिनिधी
म्हापशेंकारांची गैरसोय; पालिकेची नवे एम्बुलन्सी कडेन आडनदर
म्हापशें: नगरपालिकेच्या एम्बुलन्सीच्या दुरुस्तीच्या बिलाची रक्कम रखडिल्ल्यान ही एम्बुलन्स गॅरेजिंतूच पडून आसा. जाल्यार पालिका मंडळान नवे एम्बुलन्सीचे खरेदी कडेन आडनदर केल्ल्यान म्हापशें शारांतल्या लोकांची व्हड प्रमाणांत गैरसोय जायत आसा.
मेळिल्ले म्हायती प्रमाण म्हापशेंच्या लोकांक एम्बुलन्सीची समस्या उप्रासची न्हय, हे खातीर पालिकेन एब्मुलन्सीची सुविधा उपलब्ध केल्ली. पूण पालिके कडेन आशिल्ली एम्बुलन्स सेगीत नादुरुस्त जायत आसा. सद्या ही एम्बुलन्स दुरुस्ते खातीर गॅरेजींत आसा.
पूण दुरुस्तेच्या कामाचें बील दिवंक नाशिल्ल्यान गॅरेज धनयान एम्बुलन्स दिवपाक न्हयकार दिला. ताका लागून पालिकेचें हें वाहन फाटलो म्हयनोभर सावन गॅरेजींत पडून आसा.
मजगतीं, फाटल्या 28 डिसेंबर 2022 दिसा जाल्ले पालिका मंडळाचे साबार बसकेंत नवी एम्बुलन्स खरेदी करपाचो थाराव मंजूर केल्लो. कारण पालिके कडेन आशिल्ली एकूच एम्बुलन्स पोरणी जाल्ल्यान ती नादुरुस्त जायत आसता. ह्या वाहना बरोबरूच एम्बुलन्स आनी घाण उदक व्हरपी टँकर घेवपाचोय निर्णय सगल्यांचे संमतीन घेतिल्लो.
पूण, वयले बसकेक 10 म्हयने जाले, तरी लेगीत अजून पालिका मंडळाक नवी एम्बुलन्स आनी हेर वाहनां खरेदीचो म्हूर्त सांपडिल्लो ना. नवी एम्बुलन्स खरेदी केल्ली ना. तशेंच सद्याची एम्बुलन्स दुरुस्तीच्या बिलाच्या कचाट्यांत सांपडल्या.
ह्या प्रकाराक लागून म्हापशेंच्या लोकांची सद्या एम्बुलन्सीक लागून गैरसोय जायत आसा. पालिका मंडळाचे कार्यपद्दतीचेर लोकांनी निरशेवणी उक्तायल्या.
पालिका मंडळाच्या अस्थायी समिती कडल्यान एखाद्या बिलाच्या रकमेची मान्यताय मेळ्ळे उपरांतूच सदर बील पालिके कडल्यान दितात. पूण विद्यमान अस्थायी समितीच्यो बसकाच वेळार जायनात. जाल्यार मुखार धुकलत आसात. हाका लागून बिलांय आडावन उरतात. पांच दिसां पयलींच समितीची बसका जाली. पूण ताकतिकेन बील दिवंक नाशिल्ल्यान एम्बुलन्स गॅरेजींत पडून आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
