भांगरभूंय | प्रतिनिधी
भांगरभूंय । प्रतिनिधी
फोंडेंः देश- विदेशांत फामाद आशिल्ल्या दूदसागर घसघसो पळोवपाक येपपी पर्यटकां कडल्यान सध्या दुपेटीन, तिपेटीन दर आकारणा जावपाक लागल्ल्यान पर्यटन वेवसायाचेर ताचो गंभीर परिणाम जावपाची शक्यताय आसा. ऑनलानय नोंदणी करून पर्यटकांच लूटपाचो प्रकार कांय जाण करपाक लागल्यात. हाचेर नियंत्रण दवोरलें ना जाल्यार फुडाराक घसघश्या कडेन येवपी पर्यटकांचो आंकडो उणो जावपाची भिरांत आसा. मुख्यमंत्री डॉ प्रमोद सावंत आनी पर्यटन मंत्री रोहन खवंटे हांणी हातूंत लक्ष घालपाची मागणी थळावे वेपारी तशेंच पर्यटकांनी केल्या.
कुळें हांगाच्या ह्या दूदसागर घसघसो पळोवपाक दर वर्सा हजारांनी देशी तशेंच विदेशी पर्यटक येतात. राना खात्यान घसघश्या कडेन वचपा खातीर दरेका पर्यटका खातील दर निश्चीत केला. तातूंत जीप गाडये खातीर 500 रुपया, राना खात्याचें प्रवेश शुल्क 100 रुपया आनी जॅकेटा खातीर 40 रुपये असो दर आसा. जीपीन पर्यटकांत घसघश्या मेरेन व्हरतात. सध्या कांय जाणे ऑनलायन जीप गाडयांचे बुकींक करतात. दरेका पर्यटका कडल्यान ते देड ते दोन हजार रुपये घेतात. ताका लागून चडशे पर्यटक घसघसो पळयनास्तना परत वतात. ही परिस्थिती बदल्ली ना जाल्यार घसघसो पळोवपाक पर्यटक येवचे नात आनी ताचो फटको जीव वेवसायीक तशेंच पर्यटना कडेन संबंद आशिल्ल्या हेर वेवसायांचेर जावपाची शक्यताय आसा.
कुळें हांगच्यान दसपट्ट्यो 240 जीप गाडयो दूदसागर घसघश्याचेर वतात. दरेका जिपींतल्यान 7 पर्यटकांक व्हरतात. पर्यटक ऑनलायन जीप गाडी बुक करून कुळें बाजारांत येतात मात ऑनलायन रक्कम स्विकारनात. ताका लागून पर्यटकांक कावंटरार रांगेंत रावंन रक्कम भरची पडटा. कुळें वाठारांत नॅटवर्क सुविधा वेवस्थीत नाशिल्ल्यान पर्यटकांक बरोच वेळ रांगेंत रावचें पडटा. त्या वेळार काय जीपवाले परस्पर पर्यटकां कडेन उलोवणी करून चड रक्कम घेवंन तांका घसघश्यार घेवन वतात. दरेका पर्यटका कडल्यान पांचशें परस चड रक्कम ते घेतात. पोरू रानां खात्यान 275 जीप गाडयांक परवाने दिल्लें. हे खेपे फकत 240 जिपी सोडटात. कांय पर्यकांक त्यो मेळनात आनी ताका परत वच्चें पडटा. राना खात्यान जीप गाडयांचो आंकडो वाडयल्यार ऑनलायन बुकींगाचेर आळाबंद येवपाक शकता आनी पर्यटकांची लूटमार लेगीत बंद जावपाक शकता.
पर्यटकां कडल्यान कांय जाण चड रक्कम घेतात हें आमच्या कानार आयलां अशें दूदसागर टूर ऑपरेटर असोसिएशनाचो अध्यक्ष अशोक खांडेपारकारान सांगलें. सुमार 40 परस चड जाण पर्यटकांची लूट करतात अशें दिसून आयलां. लूटमार चलल्ल्यान फाटल्या कांय दिसां सावन थोड्या प्रमाणात पर्यटक कुळे बाजारांत येवपाक लागल्यात अशें ताणे सांगलें. लूटमार करप्यां आड पुलीस कागाळ करतले अशी म्हायती खांडेपारकारान दिली. थळावो आमदार गणेश गांवकार पर्यटकांक बरी सुविधा दिवपा खातीर यत्न करता, मात कांय जाण पर्यटकांक लूटटात तांचेर कारवाय जावपाक जावपाक जाय. असोसिएशन पर्यटकांची लूट जावपाक दिवचें ना अशेंय खांडेपारकारान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
