भांगरभूंय | प्रतिनिधी
मॅरीटायम परिशदे खातीर संरक्षण मंत्री राजनाथ सिंह गोयांत
पणजी, प्रतिनिधी : नौदळ तळा लागीं बांदकामां करपाक नौदळाच्या ना हरकत दाखल्याचो विशय सुटावो जावपा खातीर दिल्लीत बसका जातली. संरक्षण मंत्री राजनाथ सिंह हांणी पंचायत मंत्री मॉविन गुदिन्हो हांकां हें आस्वासन दिलें. बांदकामा खातीर नौदळा कडल्यान सध्या एनओसी घेवची पडटा. एनओसीची समस्या बेगिनुच सुटतली, अशें आस्वासन राजनाथ सिंह हांणी दिल्याचे गुदिन्हो हांणी सांगलें.
भारतीय नौदळ आयोजित मॅरीटायम परिशदे खातीर राजनाथ सिंह हे सोमारा गोयांत आयले. राज्याचे शिश्टाचार मंत्री ह्या नात्यान मॉविन गुदिन्हो हांणी तांकां विमानतळाचेर येवकार दिलो. वास्को नौदळ वाठारात बांधकाम करपा खातीर सध्या नौदळाची एनओसी (ना हरकत दाखलो) घेवची पडटा. हाका लागून लोकांक बरोच त्रास जाता. एनओसीची सक्ती रद्द जावची, अशी पोरणी मागणी आसा. ही मागणी आजून पुराय जाय ना. हाचेर दिल्ली बसका जातली. हो प्रस्न बेगिनुच सुटतलो, अशें गुदिन्हो हांणी सांगले.
पणजे लागसार एका नकेत्री हॉटेलांत मॅरीटायम परिशदेक सुरवात जाली. हिंदी म्हासागर वाठारातल्या बारा देशांचे प्रतिनिधी परिशदेंत वांटेकार जाल्या. घुंवळे वखदांची तस्करी, दर्यातली चांचेगिरी, स्फोटकांची तस्करी हांचेर नियंत्रण दवरपा खातीर परिशदेत चर्चा जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
