भांगरभूंय | प्रतिनिधी
मुख्यमंत्री: तरणाट्यांनी आपली संस्कृती सांबाळून दवरची
दिवचल: गोंय हें विवीध संस्कृती आनी परंपरानी नटिल्लें राज्य. गोंयांत वर्सभर सगल्या धर्मांतले विवीध सण, उत्सव चालूच आसतात. ह्या उत्सवांनी आपले संस्कृतीची वळख जायत आसता. ही संस्कृती सांबाळून दवरपाक सगल्यांनी आपले परीन योगदान दिलां. तरणाटे पिळगेनूय ही जापसालदारकी आपल्या खांदार घेवन संस्कृती आनी परंपरा सांबाळपाक योगदान दिवचें अशें आवाहन मुख्यमंत्री डॉ. प्रमोद सावंत हांणी सांखळे केलें.
सांखळी गणेशोत्सव मंडळा वतीन सांखळी बाजारांतल्या गणेश मंडपांक कोजागिरी पौर्णिमे निमतान दांडिया रास सर्त आयोजीत केल्ली. ह्या सर्तीच्या उक्तवण सुवाळ्यांत मुख्यमंत्री डॉ. सावंत उलयताले.
ह्या वेळार माचयेर नगराध्यक्षा रश्मी देसाय, उपनगराध्यक्ष आनंद काणेकार, महिला प्रभारी सुलक्षणा सावंत, नगरसेवक दयानंद बोर्येकार, निकीता नायक, विनंती पार्सेकार, शैलैश काणेकार आनी हेर मानेस्त हाजीर आशिल्ले.
सांखळी गणेशोत्सव मंडळा वतीन सांखळे विवीध कार्यावळी आयोजीत करतात. तरणाट्यां कलाकारांक माची मेळोवन दिवपाक गणेशोत्सव मंडळान भरीव कार्य केलां. कला आनी संस्कृतायेची राखण करपाकूय ह्या मंडळाचें कार्य आसा आनी हें कार्य अशेंच सुरू दवरचें अशें ह्या वेळार नगराध्यक्षा रश्मी देसाय हांणी म्हणलें.
मुख्यमंत्री डॉ. प्रमोद सावंत आनी हेरांचे हस्तुकीं दिवली पेटोवन सर्तीचें उक्तावण केलेें. हे सर्तींत सात दांडिया पंगडांनी वांटो घेतलो. हे सर्तींत पयलें इनाम क्रिएटिव्ह ग्रुप मुळगांव, दुसरें इनाम रयझिंग ग्रुप आगाशी, तिसरें इनाम अग्नी योग ग्रुप सुर्ला सांखळी, चौथें इनाम खेतोबा क्रिसाई ग्रुप मयें, पांचवें इनाम नवदुर्गा ग्रुप, आनी सवें इनाम नित्य ध्वनी ग्रुप डिंगणे, सातवें इनाम रिदम बेस्ट सांखळी हांकां फावो जालीं. सुवाळ्याक व्हड संख्येन लोक हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
