भांगरभूंय | प्रतिनिधी
टायटस नोरोन्हाः अ. भा. कोंकणी साहित्य संमेलनाच्या लोगोचें विमोचन
पणजीः साहित्य संमेलनां आमकां सदांच भास आनी साहित्याच्या विविधतायेची परब मनोवपाची संद दिता, कारण वेगळ्यावेगळ्या प्रदेशांतले लेखक संमेलनांत वांटो घेतात आनी आपली कृती आनी कल्पना वांटून घेतात. कुमठाचे स. माधव मंजुनाथ शानबाग हांणी अखील भारतीय कोंकणी परिशद 1939 वर्सा स्थापन केल्ली. आतां मेरेन हेर कार्यावळीं वांगडाच 24 फावटी अखील भारतीय कोंकणी साहित्य संमेलनां घडोवन हाडल्यांत. 25 वें अखील भारतीय कोंकणी साहित्य संमेलन मंगळुरूंत विश्व कोंकणी केंद्र, शक्तिनगरांत जातलें. प्रतिनिधी देशांतल्या वेगळ्या वेगळ्या वाठारांतल्यान सुमार 800 ह्या राष्ट्रीय कार्यावळीक हाजीर रावपाची अपेक्षा आसा आनी तांची वेवस्था करपाचें काम चालू आसा, अशें संमेलनाचे सचीव, कवी टायटस नोरोन्हा हांणी सांगलें
ते संवसारीक कोंकणी केंद्राच्या सेंट्रल हॉलांत जाल्ल्या लोगो विमोचन सुवाळ्यांत उलयताले.
तांणी मुखार म्हणलें, विद्यार्थ्यांक प्रतिनिधी शुल्काचेर खाशेली सवलत दिल्या आनी पयसुल्ल्यान येवपी प्रतिनिधीं खातीर रावपाची वेवस्था आसतली आनी प्रतिनिधींक 2 दीस कोंकणी जेवणाची रूच घेवपाक मेळटली. प्रतिनिधीं खातीर ऑनलायन नोंदणी उपलब्ध आसा.
ज्येश्ठ पत्रकार, राखणो कोंकणी साप्ताहिकाचे आदले संपादक आनी 1974 वर्सा कोंकणी भाशा मंडळ कर्नाटक स्थापन करपी मुखेल व्यक्ती फादर मार्क वॉल्डर हांणी रिमोट बटण दामून लोगोचें विमोचन केलें. मंगळुरूच्या सेंट आलोयसियस कॉलेजींतल्या कोंकणी इन्स्टिट्युटाचो संयोजक आर्टिस्ट ऑफ रिप्युट, पिंटो वामंजूर हांणी समेलानचो लोगो खास एनिमेशना सयत डिझायन केला.
विश्व कोंकणी केंद्राचे अध्यक्ष नंदगोपाल शेणॉय हांणी संमेलन पत्रक आनी साहित्य अकादेमीचो पुरस्कार विजेते, वरिश्ठ लेखक गोकुलदास प्रभून प्रतिनिधी पासांचें विमोचन केलें. ऑल्वीन डीसौझा, पनीर – कॅथलिक सभा, मंगळूर प्रदेश (आर) च्या अध्यक्षान क्यूआर कोड स्कॅन करून ऑनलायन नोंदणीचें उक्तावण केलें.
हे कार्यावळीक पालक संस्था अखील भारतीय कोंकणी परिशदेचे अध्यक्ष अरुण उभयकर हाजीर आशिल्ले.
स्वागत समितीचो वावुरपी अध्यक्ष एच एम पेर्नलान सोयऱ्यांक आनी उपस्थितांक येवकार दिलो. साहित्य अकादेमीच्या कोंकणी सल्लागार मंडळाचे निमंत्रक मेल्वीन रॉड्रीग्सान सुत्रसंचालन केलें. गुरुदत्त बंटवाळकारान उपकार मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
