भांगरभूंय | प्रतिनिधी
पणजी, प्रतिनिधी : हरमलांतल्या गिरकावाड्यार उदरगत प्रतिबंधीत वाठारांत बेकायदेशीर इमारतीचें बांदकाम करून तातूंत हॉटेल सुरू केल्लें. ताची दखल मुंबय उच्च न्यायालयान घेवन बुधवारा दीस (सांजेवेळार ५ वरां मेरेन) हें हॉटेल सील करपाचे निर्देश पेडणें उपजिल्होधिकारी आनी पुलीस निरीक्षकांक दिले.
सर्व्हे क्रमांक ६३/ ९२ त हे इमारतीचें बांदकाम जालां. बांदकाम खातीर संबंदीतांनी खंयच्याच सरकारी यंत्रणे कडल्यान परवानगी घेवंक ना, अशें कळटा. तशेंच बेकायदो इमारत बांदून तातूंत हॉटेलूय सुरू केलां.
ह्या बेकायदेशीर प्रकल्पाक संबंदीतांनी घर क्रमांक मेळयला. ह्या प्रकल्पाच्या बांदकामा विशीं खंडपीठान हातूंत घुस्पल्ल्या सरकारी अधिकार्यांचेर खर कारवाय करपाचे आदेश उच्च न्यायालयान दिल्यात.
बांदकाम मोडटले
मजगतीं, सरकारी यंत्रणेन हें बांदकाम मोडून उडोवपाचो आदेश जारी केल्लो. ताची अंमलबजावणी ३१ ऑक्टोबराक जातली. हे विशींचो अनुपालन अहवाल १ नोव्हेंबराक सादर करपाचो आदेश खंडपीठान पेडणेंचे उपजिल्होधिकारी आनी हरमल पंचायत सचिवांक दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
