भांगरभूंय | प्रतिनिधी
उदक दुशीत नाशिल्ल्याचो अधिकाऱ्यांचो दावो, नमुने धाडले तपासपाक
भांगरभूंय । प्रतिनिधी
वाळपय : वाळपय पालिकेंतल्या म्हाऊस वाठारांत वचपी रस्त्याक तेंकून आशिल्ल्या एका घरांत पियेवपाच्या उदकाचे पायपलायनींतल्यान जंतू भशेन कितें तरी सांपडिल्ल्यान वाठारांत बोवाळ पडलो. थळाव्यांच्या म्हणण्या प्रमाण तो किडो आशिल्ल्याचो दुबाव उक्तायल्लो आसलो तरीय, वाळपय उदका पुरवण खात्याच्या अधिकाऱ्यांनी हो दुबाव भायर मारला.
खबरदारीचो उपाय म्हूण उदका पुरवण विभागाच्या अधिकाऱ्यांनी संबंदीत वाठाराची पळोवणी करून खूबश्या घरांतल्या नळाच्या उदकाचे नमुने तपासणी खातीर एकठांय केल्यात. तशेंच पुराय पायपलायन फ्लश केल्या. उदक प्रदुशीत नाशिल्ल्याचो मुळावो निकश अधिकाऱ्यांनी काडला.
मेळिल्ले म्हायती प्रमाण, मंगळारा दनपारां म्हाऊस वाठारांतल्या एका घरांत पियेवपाच्या उदकांत किडी भशेन कितें तरी दिसलें. ताका लागून लोकां मदीं भंयाचें वातावरण तयार जालें. संबंदीत कुटुंबियांनी तशेंच थळाव्या लोकांनी उदकांत किडे निर्माण जाल्ल्याचो दुबाव उक्तावऩ हें उदक भलायकेक हानिकारक आशिल्ल्याची शक्यताय उक्तायल्ली.
हे संबंदांत कागाळ मेळटाच उदका पुरवण खात्यान तत्काळ दखल घेतली. सहाय्यक अभियंते मदन देसाय हांच्या मार्गदर्शना खाला कर्मचाऱ्यांचो पंगड सांजे वेळार घडणुकेचे सुवातेर पावलो. ताणें वाठारांतल्या लोकां कडेन खोलायेन चर्चा करून परिस्थितीचो नियाळ घेतलो. तपासणे वेळार एक घर सोडून हेर खंयच्याच घरांत अशी समस्या नाशिल्ल्याचें स्पश्ट जालें. अधिकाऱ्यांनी दिल्ले म्हायती प्रमाण, संबंदीत उदकाचे नमुने खात्याचे प्रयोगशाळेंत तपासणी खातीर धाडल्यात. निमाणो अहवाल अजून मेळूंक ना, तरीय मुळावे तपासणेंत उदकांत कसलोच दुशीतपणा सांपडूंक ना. उदकांत गरजेच्या प्रमाणांत कोरिनाचो वापर केल्ल्यान तातूंत जंतू आसपाची शक्यताय सामकीच उणी आशिल्ल्याचें अधिकाऱ्यांनी स्पश्ट केलें. तशेंच हो प्रकार दाबोस उदका प्रकल्पाचे पायपलायनींतल्यान उप्रासूंक ना, असोय तांणी दावो केला. खात्री करचे खातीर वाठारांतल्या हेर घरांतल्या नळांचें उदक तपासलां. मात खंयच अशी गजाल सांपडूंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
