भांगरभूंय | प्रतिनिधी
जोड वीज नियमन आयोगान जारी केली अधिसुचोवणी
भांगरभूंय । प्रतिनिधी
पणजी : विवीध वाठारांनी जावपी खंडीत वीज पुरवण, वीज गिरायकांच्यो कागाळी हे विशीच्यो नोंदी वीज खात्यान उक्त्यो करपाक जाय. कागाळींची पुस्तिका गिरायकांक उक्ती करपा सयत विजेच्या वापरा विशींचें वर्सुकी ऑडीट वीज खात्यान करपाक जाय, अशा अटींची अधिसुचोवणी जोड वीज नियमन आयोगान (जेईआरसी) जारी केल्या.
जोड वीज नियमन आयोगान प्रस्तावीत अटींचो मसुदो जारी केला. ह्या मसुद्याचेर लोकां कडल्यान सुचोवण्यो मागयल्यात. ह्या सुचोवण्यांचो विचार करून अटीं विशींची निमाणी अधिसुचोवणी जारी जातली.
खंडीत वीज पुरवण वा हेर गजालीं विशी कागाळ नोंद करप तशेंच ती कागाळ सुटावी करपा विशीं योग्य तरेचे वेवस्थापन आसपाक जाय. कागाळ कशी करची, कागाळ सुटावी करपा विशीं खात्याची पद्दत कशी आसा, हाची म्हायती गिरायकाक मेळपाक जाय. तशेंच कागाळ नोंदणीचो बूक गिरायकाक पळोपा खातीर उपलब्ध आसपाक जाय. विजेचे दर, बील आकारपाची पद्दत तशेंच खात्याच्यो तरेकवार सेवा हाची म्हायती गिरायकाक मेळपाक जाय. 20 मे 2026 मेरेन सुचोवण्यो वा हरकती सादर करपाचो कालावधी आसा.
वीज वापराचें ऑडीट
वीज खात्यान दर वर्सा विजेच्या वापराचे ऑडीट करपाक जाय. उपलब्ध वीज, विजेची गरज, विजेचो वापर आनी गळटी हे विशींचो वर्सुकी अहवाल तयार करून 4 म्हयन्यां भितर तो संकेतथळाचेर उपलब्ध करपाची अट आसा. गिरायकाक 24 वरां वीज उपलब्ध करप हे उद्दिश्ट बाळगून वीज खात्यान कार्यपद्दतींत सुदारणा करपाच्या अटींचो आस्पाव अटींत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
