भांगरभूंय | प्रतिनिधी
17 जाणांर अटक, 94.70 लाखांचें साहित्य जप्त
भांगरभूंय । प्रतिनिधी
पणजी : तिसवाडी म्हालांत दोना पावला आनी सांतिनेझ वाठारांतल्यान अमेरिकन नागरिकांक रीण आनी हेर सुविदा दिवपाच्या नांवा खाला फटवणूक करपी दोन बनावट कॉल सेंटरां गुन्यांव फांट्यान उजवाडाक हाडल्यात. ह्या प्रकरणांत गुन्यांव फांट्यान दोना पावला आनी सांतिनेझ वाठारांत दोन कडेन धाडी घालून 17 जाणांक अटक केली. तांचे कडल्यान 94.70 लाख मोलाचे 15 लॅपटॉप, 24 मोबायल, 4 चारचाकी आनी हेर साहित्य जप्त केलें.
सांतिनेजांतले एके इमारतीच्या पयल्या माळ्या वयल्या एका फ्लॅटांत कांय दुबावीत कारवायो चलतात आनी थंय खूबशे तरणाटे रावतात अशी म्हायती गुप्तहेरां कडल्यान मेळिल्ली. ते प्रमाण, गुप्तहेरांनी दिल्ले म्हायतीची चवकशी केली तेन्ना थंय बनावट कॉल सेंटर चालू आशिल्ल्याची म्हायती मुखार आयली.
हाची दखल घेवन अधिक्षक राहुल गुप्ता आनी जिवबा दळवी हांच्या मार्गदर्शना खाला निरिक्षक तुषार लोटलीकार हांच्या फुडारपणा खाला पंगडान बुधवारा 29 एप्रील ते मध्यानरातीचीं 2 ते सकाळीं 7.10 वरां मजगतीं वयले सुवातेर कार्यवाही केली. त्या वेळार पंगडान गुजरातचे यश राजेश देसाई (29), करण मला (23) हांचे सयत सात जाणांक ताब्यांत घेतले. जाल्यार मिहीर देसाई आनी सज्जन हे दोग जाण फरारी आसात. तांचे कडल्यान 30 लाख मोलाचे 7 लॅपटॉप, 13 मोबायल फोन, एक चारचाकी आनी हेर साहित्य जप्त केलें. ते उपरांत ह्या प्रकरणांत वयल्या दुबावितां आड भारतीय न्याय संहितेच्या कलम 319 (2), 318 (4), 61 (2) तशेंच म्हायती आनी तंत्रज्ञान कायद्याचें कलम 66 सी आनी 66 डी खाला गुन्यांव दाखल करून अटक केली.
हेच मजगतीं, दोना पावला वाठारांतल्या एका बंगल्यांत बनावट कॉल सेंटर चालू आशिल्ल्याची म्हायती गुन्यांव फांट्याक मेळ्ळी. ते प्रमाण अधिक्षक राहुल गुप्ता आनी जिवबा दळवी हांच्या मार्गदर्शना खाला निरिक्षक मंगेश वळवयकार हांच्या फुडारपणा खाला उपनिरिक्षक अमीन नायक आनी हेर पंगडान बुधवारा 29 एप्रीलाक फांतोडेर 5 ते दनपारां 12.15 वरां मजगतीं दोना पावलाच्या सागर हावसींग सोसायटींतल्या एका बंगल्याचेर धाड घातली. त्या वेळार गुन्यांव फांट्यान महिपालसिंग राठोड, शुभम देसाई हांचे सयत 10 जाणांक ताब्यांत घेतले. तांचे कडल्यान 64.70 लाख मोलाचे 8 लॅपटॉप, 11 मोबायल फोन, तीन चारचाकी आनी हेर साहित्य जप्त केलें. ते उपरांत ह्या प्रकरणांत वयल्या दुबावितां आड भारतीय न्याय संहितेच्या कलम तशेंच म्हायती आनी तंत्रज्ञान कायद्याच्या विवीध कलमा खाला गुन्यांव दाखल करून अटक केली.
वयल्यो दोनूय टोळयो बनावट कॉल सेंटरा वरवीं रीण वितरण कंपनीचे अधिकारी आशिल्ल्याचें भासोवन अमेरिकन नागरिकां कडेन संपर्क करताले. तांकां रीण आनी इन्स्टंट मनी दिवपाचें हांयस दाखयताले. ते खातीर तांकां वेगवेगळ्या तरांची गिफ्ट कार्डां खरेदी करपाक लावन फटवणूक करताले, अशें मुखार आयलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
