भांगरभूंय | प्रतिनिधी
मुख्यमंत्री: ऑनलायन ई बाजार पोर्टलाचें अनावरण
पणजी: स्वयंपूर्ण ई बाजाराक लागून गोंयच्या थळाव्या उत्पादकांक देशभरांतली बाजारपेठ मेळटली अशें मुख्यमंत्री डॉ. प्रमोद सावंत हांणी सांगलें. मंगळारा ऑनलायन ई बाजार पोर्टलाच्या अनावरणा सुवाळ्या वेळार ते उलयताले.
ह्या वेळार मुख्य सचीव पुनीत कुमार गोएल, सांख्यिकी खात्याचे संचालक विजय सक्सेना, ग्रामीण विकास खात्याचे संचालक भूषण सावयकार आनी हेर अधिकारी हाजीर आशिल्ले.
डॉ. सावंत हांणी मुखार म्हणलें, स्वयंपूर्ण गोंया खाला आमी पयलीं स्वयंपूर्ण चवथ ही संकल्पना राबयली. हाका गोंयांतल्या बायलांनी बरो प्रतिसाद दिलो. हाका लागून गोंयांतल्या एका कोनशांत तयार जाल्लो फराळ दुसऱ्या कोनशांत पावलो. तें येस पळोवन आमी आतां स्वयंपूर्ण ई बाजार सुरू केला. हे वरवीं कोणाकूय आपलें उत्पादन ऑनलायन पद्दतीन विकूंक मेळटलें.
ह्या ऑनलायन मंचा खातीर सद्या 26 बायलांनी नोंदणी केल्या. तांकां पयल्या टप्प्यांत उत्पादनाचें पॅकेजींग, ब्रॅण्टींग आनी परवाने कशे मेळोवप हाचें प्रशिक्षण दिलां. दुसऱ्या टप्प्यांत तांकां स्वयंपूर्ण ई बाजार अॅप कशें वापरप हें शिकयतले. फुडले 15 दीस हें अॅप आनी पोर्टल चांचणी पद्दतीन चलयतले. 1 नोव्हेंबर मेरेन हे दोनूय सगल्यां खातीर उक्ते जातले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
