भांगरभूंय | प्रतिनिधी
25 जखमी; गोरवांक लागून घडलो अपघात
फोंडें: थातोड-धारबांदोड्यां राष्ट्रीय म्हामार्गार मंगळारा सकाळीं 11.30 वरांचेर मिनी बस रस्त्याचे कुशीक लवंडली. ह्या अपघातांत 25 जाण जखमी जाले. राष्ट्रीय म्हामार्गार बशिल्ल्या गोरवांक लागून हो अपघात घडलो. 9 जखमींक अदीक उपचारा खातीर खाजगी हॉस्पिटलांत दाखल केल्यात. कुळें पुलिसांनी अपघाताचो पंचनामो केला.
पुलिसांनी दिल्ले म्हायती प्रमाण केए 51 एए 3058 क्रमांकाची मिनी बस बंगळुरू वताली. त्या वेळार थातोड-धारबांदोड्यां राष्ट्रीय म्हामार्गार बशिल्ल्या गोरवांक चुकोवपा खातीर चालकान बस रस्त्याचे उजवे कुशीक घेतली. पूण रस्त्यार नाशिल्ली गाय अचकीत मिनी बशी मुखार धांवत आयिल्ल्यान चालक गोंदळ्ळो. गायेक वाटावपा खातीर चालकाचें नियंत्रण सुटून बस रस्त्याचे कुशीक लवंडली. हातूंत बशीतले सगले प्रवासी जखमी जाले.
जखमींचेर गस्तीर आशिल्ल्या पुलीस वाहनांतल्यान पिळयां मुळाव्या भलायकी केंद्रांत दाखल केले. उपरांत अदीक उपचारा खातीर मॅथ्यू के.एस., ऍलन जॉन, ईशा बिबुट, कॅथरीना, आर. राहूल, ऍशले जॉन, किरण लुमा, थॉमस सेबेस्तियान आनी जिमी जॉन हांकां खाजगी हॉस्पिटलांत दाखल केल्यात.
मंगळारा जाल्ल्या अपघात थळा सावन एक किलोमिटर अंतराचेर 2 ऑक्टोबर दिसा वोल्वो बस लवंडून 26 जाण जखमी जाल्ले जाल्यार बसीच्या ड्रायव्हराक बशी पोंदा चिड्डून मरण आयिल्लें. ते खातीर ह्या वाठारांत रस्त्यार बसपी गोरवां येरादारी खातीर घातक थारत आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
