पालिकेचो 500, पंचायतीचो 100 रुपया

भांगरभूंय | प्रतिनिधी

म्हापश्यां रोजां विक्रेत्यांनी सोपो करा वयल्यान उक्तायली निरशेवणी

म्हापशें: दसऱ्याचे फाटभुंयेर हावेरी कर्नाटका सावन म्हापशें शारांत व्हड प्रमाणांत रोजांची फुलां विकपा खातीर आयल्यांत. ह्या विक्रेत्यांक म्हापशें पालिकेन दोन सुवातो दिल्ल्यो. हे खातीर दरेक विक्रेत्यां कडल्यान दर दिसा 500 रुपया सोपो कर आकारलो. जाल्यार शेजारच्या वेर्ला-काणका, बस्तोडें आनी हेर पंचायतींनी हो कर 100 रुपया आकारलो. जाल्यार सोपो कर दिवपाक असमर्थताय दाखयिल्ल्यान कांय विक्रेत्यांचो म्हाल जप्त केलो. पालिकेचो सुमारा भायर सोपो कर आनी कारवायेचेर विक्रेत्यांनी निरशेवणी उक्तायली.

मेळिल्ले म्हायती प्रमाण तीन दिसां खातीर आयतारा हे विक्रेते रोजाची फुलां घेवन म्हापश्यां आयिल्ले. ह्या विक्रेत्यांक पालिकेन हळदोणें प्रसार आनी करासवाड्यार सुवात निश्चीत केल्ली. हे खातीर पालिकेन दर दिसा 500 रुपया सोपो कर लागू केल्लो. पूण खूबशा जाणांक सोपो कराचो दर परवडूंक नाशिल्ल्यान तांणी शेजारच्या पंचायत वाठारांत फुलां विकप पसंत केलें. वेर्ला-काणका, पर्रा, बस्तोडें आनी शेजारच्या वाठारांनी ह्या विक्रेत्यांनी बस्तान मांडले. थंय पंचायती कडल्यान तांकां दरेकी 100 रुपया सोपो कर लागू केलो.

सुवात दिवन लेगीत जाय थंय बसपी विक्रेत्यांचेर पालिकेन कारवाय केली. तशेंच कांय जाणांनी सोपो कर दिवपाक न्हयकार दिल्ल्यान तांचेर कारवाय केली. पालिका कर्मचाऱ्यांनी ह्या विक्रेत्यांचें साहित्य आनी फुलां जप्त केलीं. ताका लागून विक्रेते आनी पालिका कर्मचाऱ्यां मदीं बाचाबाची जाली.

आयतारा ह्या विक्रेत्यां कडल्यान पालिकेन सोपो कर घेतिल्लो. हो सोपो कर तीन दिसांचो आशिल्ल्यांचो समज विक्रेत्यांचो जालो. पूण सोमारा सकाळीं दुसऱ्या दिसा सोपो कर मागपा खातीर गेल्ल्या पालिका कर्मचाऱ्यां कडेन कांय विक्रेत्यांनी हुज्जत घातली. गिरायक नाशिल्ल्यान सांजवेळा शुल्क दिता अशें कांय जाणांनी सांगलें. उपरांत संबंदितांचेर पालिकेन कारवाय करपाक सुरवात केली.

पालिकेन रोजांची फुलां विकपा खातीर दोन कडेन सुवातो आंखून दिल्ल्यो. तरी लेगीत कांय जाण मेळत थंय वेवसाय करताले. हाका लागून संबंदितांचेर कारवाय करून म्हाल जप्त केलो अशी म्हायती नगराध्यक्षा प्रिया मिशाळ हांणी दिली.