काॅण्ट्रेक्टराचे निश्काळजीक लागून तरणाट्याक मरण
भांगरभूंय | प्रतिनिधी
फोंडें, प्रतिनिधी : बेतोडा – बोरयेच्या बगल रस्त्यार पार्क करून दवरिल्ल्या हिताची मशीनाक धपको दिवन आशिष अरुण पाटील (४४, केजीएन-बेतोडा, मूळ- खानापूर- बेळगांव) ह्या दुचाकी चालकाक जाग्यारूच मरण आयलें. रस्त्याचें रुंदीकरणाचें काम करतना ह्या वाठारांत कसलेच तरेचे तक्टे वा बॅरिकेट्स लावंक नाशिल्ल्यान कंत्राटदाराच्या निश्काळजीपणाक लागून पाटील हांकां मरण आयिल्ल्याचो आरोप थळावे लोक करतात. कंत्राटदाराचेर कारवाय करपाची मागणी तांणी केल्या.
पुलिसांनी दिल्ले म्हायती प्रमाण, जीए – ०५- व्ही- ५१८६ क्रमांकाची दुचाकी घेवन आशिष आयतारा रातचो बोणबागाच्यान बेतोडा आपल्या घरा वतालो. रस्त्या कुशीक पार्क केल्ल्या हिताची मशीनाचो अदमास येवंक नाशिल्ल्यान तांणी मशिनाक नेटान धपको दिलो. हातूंत पाटील हांकां जाग्यारूच मरण आयलें. अपघाताची म्हायती मेळटांत उपनिरीक्षक रश्मी भाईडकार हांणी अपघाताचो पंचनामो केलो. मरण आयिल्लो तरणाटो बेतोडचे उद्देगीक वसणुकेंत काम करतालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
