गोवा डेरीच्या विनायक धारवाडकारा आड आरोप निश्चीत

भांगरभूंय | प्रतिनिधी

50 हजार रुपयांची लांच घेतिल्ल्याचें प्रकरण

पणजी: फोंडेंच्या गोंय राज्य सहकारी दूद उत्पादक संघटणेचे (गोवा डेरी) अधिकारी सरकारी कर्मचाऱ्यांच्या अधिकार क्षेत्रांत येता अशें निरिक्षण नोंद करून फोंडेंच्या अतिरिक्त सत्र न्यायालयान आदले सहाय्यक वेवस्थापक विनायक धारवडकार हाचे आड लांच प्रकरणांत आरोप निश्चीत करपाचो आदेश जारी केला. हे विशींचो आदेश फोंडेंचे अतिरिक्त सत्र न्यायाधीश छोलू गांवस हांणी दिलो.

ह्या प्रकरणांत दक्षता खात्याच्या भ्रश्टाचार विरोधी पंगडान (एसीबी) 8 मार्च 2021 दिसा पणजेंतल्या उत्तर गोंय जिल्हो सत्र न्यायालयांत आरोपपत्र दाखल केलां. ते प्रमाण हे विशीं मुंबयच्या इन्स्टॉलेशन सर्विसेस ह्या इलेक्ट्रिकल कंत्राटदाराचे गोंयचे प्रतिनिधी अमेय पालेकार हांणी एसीबीत कागाळ दाखल केल्ली. ते प्रमाण दुबावीत धारवाडकार गोवा डेरीचो सहाय्यक वेवस्थापक (अभियंतो) आशिल्लो. तशेंच तो केंद्र सरकाराच्या राष्ट्रीय डेरी विकास प्रकलपाचो गोंयचो मुखेलीय आशिल्लो. ह्या प्रकल्पांतल्यान गोवा डेरीचो विकास करपा खातीर केंद्र सरकारान आठ कोटी रुपया मंजूर केल्ले. ह्या प्रकल्पा खाला खूबशो मशिनरी तशेंच हेर साधन सुविधा खरेदी करपाची आशिल्ली.

त्या वेळार मुंंबयच्या इन्स्टॉलेशन सर्विसेव ह्या इलेक्ट्रिकल कंत्राटदाराक ट्रान्सफॉर्मर्स, प्रोजेक्शन गियर, एलटी पॅनल एमसीसी आनी पूश बटन स्टेशनाची पुरवण करपाचो 52 लाखा 78 हजार 936 रुपया मोलाचें कंत्राट मेळिल्लें.

कंत्राटदाराच्या कामाची ऑडर दिवपा खातीर दुबाविताक कागाळदारा कडेन पयली पांच लाख रुपया लांच मागिल्ली. हाका आक्षेप घेतले उपरांत दुबावितान वाटाघाटी केले उपरांत ही रक्कम कमी करून 50 हजार थारली. ते प्रमाण 20 हजार रुपया 25 ऑगस्टाक जाल्यार 30 हजार रुपया 27 ऑगस्ट 2018 दिसा दिवपाचें थारिल्लें. उपरांत तातूंत बदल करून 50 हजार रुपया 27 ऑगस्ट दिसा घेवपाचें थारलें. हाची दखल घेवन कागाळदार पालेकार हांणी एसीबी कडेन कागाळ करून सविस्तर म्हायती दिली.

कागाळी प्रमाण पंगडान कागाळीची दखल घेवन 27 ऑगस्ट 2018 दिसा गोवा डेरी कुशीक सांपळो रचून संबंदीत वेव्हार सुरू आसतना दुबाविताक लांच स्विकारतना रंगेहात धरिल्लो. उपरांत पंगडान दुबाविता आड भ्रश्टाचार प्रतिबंधक कायद्याचें कलम 7 आनी हेर अंतर्गत गुन्यांव दाखल करून अटक केल्ली. उपरांत न्यायालयान पयली दुबाविताक सात दिसांची पुलीस कोठी दिल्ली. ती सोंपले उपरांत ताका 14 दीस न्यायालयीन कोठयेंत धाडिल्लो.

मजगतीं, दुबावीत धारवाडकारान न्यायालयांत जामीन अर्ज दाखल केलो तेन्ना न्यायालयान ताका 11 सप्टेंबर 2018 दिसा 50 हजार रुपया आनी हेर अटीचेर सशर्त जामीन मंजूर केल्लो. हे विशीं एसीबीन तपास पूर्ण करून न्यायालयांत आरोपपत्र दाखल केलें.

ह्या प्रकरणाची न्यायालयांत सुनावणी जाली तेन्ना दुबावीत धारवाडकार सरकारी कर्मचाऱ्यांच्या अधिकार क्षेत्रांत येनाशिल्ल्याचो दावो करून ताचे आड भ्रश्टाचार प्रतिबंधक कायद्याचें कलम खाला आरोपांतल्यान सुटका करपाची मागणी न्यायालयांत केली. हे विशीं गोंय राज्य सहकारी दूद उत्पादक संघटणेक (गोवा डेरी) राज्य आनी केंद्र सरकारा कडल्यान निधी उपलब्ध केल्लो. ताका लागून वयल्या कायद्या खाला दुबावीत धारवाडकार सरकारी कर्मचाऱ्याच्या अधिकार क्षेत्रांत येत आशिल्ल्याचें निरिक्षण नोंद करून न्यायालयान ताचे आड आरोप निश्चीत करपाचो आदेश जारी केला.