भांगरभूंय | प्रतिनिधी
कीटक नियंत्रण फवारो मारप पुराय जायना तो मेरेन युनिटांत उत्पादन बंद
मडगांव, प्रतिनिधी ः लोटलेंतल्या एका गिरायकाक जासिया सॅंडविच ब्रेडांत हुंदराच्यो लेंडयो मेळ्ळ्यो. गोंय कॅनच्या मार्गदर्शना खाला तांणी मडगांव एफडीए कार्यालयांत कागाळ केले उपरांत सांकवाळच्या युनिट पेस्ट कंट्रोल करी मरेन बंद करपाचो निर्देश दिला.
मेळिल्ले म्हायती प्रमाण, लोटलेच्या एका गिरायकान भुरग्यां खातीर नाश्तो तयार करपा खातीर सॅंडविच ब्रेड घेतिल्लो. पाकीट उगडटना गिरायकाक ब्रेडांत हुंदराच्यो लेंडयो मेळ्ळ्यो. अशें ताका तीन ब्रेडांनी मेळ्ळ्यो. गिरायकान ब्रेड आनी पॅकेजींग पुरावो म्हणून दवरलो आनी उपरांत गोंय कॅन संस्थेच्या मार्गदर्शना प्रमाण दक्षिण गोंय अन्न आनी वखदां खात्याच्या कार्यालयांत पुरावे सादर केले.
गोंय कॅन संस्थेन वरिश्ठ अन्न सुरक्षा अधिकारी रिचर्ड नरोन्हा कडेन हें प्रकरण व्हेलें. हाची दखल घेतले उपरांत एफडीएच्या मुखेल कार्यालयांतल्या पंगडान ब्रेड तयार करपी बेकरेक भेट दिली. आनी तपासणी उपरांत एफडीएन कलम 32 खाला नोटीस जारी केल्या. युनिट सुवातेर जो मेरेन पुरायपणान कीटक नियंत्रण फवारो मारप पुराय जायना तो मेरेन युनिटांत उत्पादन बंद करपाचो आदेश दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
