भांगरभूंय | प्रतिनिधी
म्हापशें: शॅक धोरणांत पर्यावरण खात्यान शॅकांची संख्या उणी करून अंतर वाडयिल्ल्याच्या मुद्या संबंदी पर्यावरण पंगडान भेट दिवन लक्ष दिलां. पर्यावरण खात्याचो प्रस्न विचारांत घेवन ताचेर उपाय काडटले अशें आस्वासन मुख्यमंत्री डॉ. प्रमोद सावंत हांणी शॅक धनी संघटणेच्या शिश्टमंडळांक दिलें.
बुधवारा करासवाडो, म्हापश्यां कळंगूटेचे आमदार मायकल लोबो हांच्या फुडारपणा खाला अखील गोंय शॅक धनी संघटणेच्या शिश्टमंडळान मुख्यमंत्र्याची भेट घेतली. वागातोर दर्यादेगां वयल्या शॅकांची संख्या उणी करप आनी कळंगूट आनी कांदोळी दर्यादेगां वयल्या शॅकांची सुवात बदलप हो मुद्दो ह्या शिश्टमंडळान मुख्यमंत्र्या मुखार मांडलो.
ह्या वेळार शॅक धनयांचे अध्यक्ष क्रुझ कार्दोज, सरचिटणीस जॉन लोबो, श्रीधर गोलतेकार, विद्याधर दाबोळकार आनी हेर ह्या वेळार हाजीर आशिल्ले.
कळंगूटे गांवकारवाडो हांगासरले शॅक सावतावाडो दर्यादेगेर हालयले. जाल्यार माड्डोवाड्या वयल्या शॅकाचेंय स्थलांतर केलें. कांदोळे वाडीतले शॅक दांडो हांगा हालयले. तशेंच हणजूण, वागातोर आनी शापोरा-वझरांत हांगासरल्या शॅकांची संख्या आठ वयल्यान तीन केल्ल्याचें शिश्टमंडळान मुख्यमंत्री डॉ. सावंत हांचे नदरेक हाडून दिलें.
अध्यक्ष क्रुझ कार्दोज हांणी म्हणलें, पर्यटन खात्यान प्रदुशण नियंत्रण मंडळ आनी दर्यादेग क्षेत्र वेवस्थापन म्हामंडळा बरोबर जोड पळोवणे उपरांत ह्यो विसंगती निर्माण जाल्यात. ताका लागून आमी मुख्यमंत्र्याक निवेदन सादर करून शॅक धनयांची वयली गैरसोय पयस करची अशी मागणी केली. मुख्यमंत्री हो विशय सोडयतले अशें आस्वासन आमकां दिलां.
आमदार मायकल लोबोन म्हणलें, गोंय दर्यादेग वाठार वेवस्थापन म्हामंडळाची बसका हाचे पयलींच जाल्ली. तांणी खूबशे शॅक मंजूर केल्ले. पूण नुस्तेमार जे सुवातेंत तांचे परंपरीक उपक्रम राबयतात थंय शॅक दिले. ताका लागून आमकां जीसीझॅडएमएक दर्यादेगेची परतून पळोवणी करपाची गरज आशिल्ली आनी तांणी बुवाधरा पळोवणी केली. ग्रावंड रिअॅलिटी पळयले उपरांत ते आतां गरजेचे ते बदल करतले. आमी मुख्यमंत्र्यांक हातूंत हस्तक्षेप करपाची विनंती केल्या, आनी तांणी ती मान्य केल्या. अहवाल येतकूच प्राधिकरण गरजेची ती कारवाय करतलें अशें लोबो हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
