भांगरभूंय | प्रतिनिधी
टावट्स आनी क्लबाच्या दोन कामगारांक अटक
म्हापशें, प्रतिनिधी ः नायकावाडो- कळंगूटे कर्नाटकांतल्या पर्यटकांक बरी सेवा दिता अशें सांगून क्लबाच्या रुमांत बंद करून ३० हजार रुपया लुटपाची घडणूक घडली. ह्या प्रकरणांत कळंगुटे पुलिसांनी एक टावट्स आनी दोन क्लबाचे कामगार मेळून तिगांक अटक केल्या.
अटक केल्ल्यां मदीं, शाहरुख बशीर अहमद खान (25, आल्मेदावाडो पर्रा, मुळ हावेरी कर्नाटक), सिरील आलेक्स डायस (42, देवसू- पेडणे) आनी अविनाश कांती पटेल (32, खोब्रावाडा, कळंगूटे, मुळ दमण दिव) ह्या तिगांचो आस्पाव आसा. सोमारा रातीं 10.30 वरांचे सुमाराक ही घडणूक घडली. ह्या प्रकरणां विशीं एस. संतोषकुमार (कोलार कर्नाटक) हांणी पुलिशेंस कागाळ केल्ली.
दुबावीत शाहरुख खान हो एस. संतोषकुमार आनी ताच्या इश्टाक कळंगुटे मेळ्ळो. तुमका बरी सेवा दिता अशें सांगून दुबावितान तांकां नायकावाडाच्या एका क्लबांत व्हेले. थंय दुबावितांनी दोगांय पर्यटकांक एका कुडींत बंद करून मारपेट करून तांकां धमकायले. तशेंच युपीआय वरवीं आपल्या बँक खात्यांत 20 हजार रुपया हस्तांतरीत करपाक बळजबरी केली. ही गजाल कोणाकूय सांगल्यार ताचे गंभीर परिणाम जातले अशी धमकी दिली आनी तांका सोडले अशें कागाळींत बरयलां. मंगळारा ह्या पर्यटकांनी कळंगुटे पुलिशेंत कागाळ केली. ते प्रमाण पुलिसांनी तिनूय दुबावितांक अटक केली. आनी दुबावितां आड अपहरण, मारपेट, धमकावप आनी जबरदस्तीन चोरी करपा विशीं गुन्यांव नोंद केलो.
मजगतीं, म्हापशें न्यायालयान दुबावितांक तीन दीस पुलिसांच्या ताब्यांत दवरपाचो आदेश दिला. पुलिस निरिक्षक परेश नायक हांच्या मार्गदर्शना खाला पुलीस उपनिरिक्षक राजाराम बागकार फुडली चवकशी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
