भांगरभूंय | प्रतिनिधी
तुयेंच्या पंचाची पेडणे पुलिशेंत कागाळ
पणजी, प्रतिनिधी ः तुयेंची सरपंच सुलक्षा नायक हिचो घोव नरेश नायक (गांवकारवाडो- तुयें) हाणें आपणाक धमकी दिल्या, अशी कागाळ पंचायत वांगडी उदय मांद्रेकार हांणी पेडणें पुलीस स्टेशनांत केल्या. ‘तुका कितें तें दाखयता’ अशी धमकी फोना वयल्यान दिल्ल्यान म्हज्या जिवाक धोको आसा, अशेंय मांद्रेकारान पत्रकारांक सांगलें.
पंचायत मंडळाचे बसकेंत उदरगतीच्या कामाच्या फायली वयल्यान हें घडलें अशें मांद्रेकार हांणी सांगलें. म्हज्या वाठारांतल्या उदरगतीच्या कामाची फायल आडकून दवरल्या. हे विशीं सरपंचाक बसकेंत विचारलें तेन्ना तांणी कसलीच जाप दिली ना. त्या वेळार सरपंचांनी पक्षपात करिनासतना आपलें काम करचें अशें हांवें म्हणिल्लें. बसके उपरांत हांव घरा आयलों. उपरांत सरपंचाच्या घोवान नरेश हाणें म्हाका फोन करून गाळी संवल्यो आनी धमकी दिली अशें मांद्रेकार हांणी पत्रकारां कडेन उलयतना सांगलें. ‘तूं म्हजे बायलेक त्रास दिता. तु स्वताक हुशार समजता कितें? तुका कितें तें दाखयतां’ अशी धमकी दिल्या, अशें मांद्रेकारान कागाळीत म्हणलां.
मजगतीं, सरपंच पद बायलां खातीर राखून दवरिल्ल्या पंचायतींत सरपंचाच्या घोवान हस्तक्षेप करचो न्हय अशी सुचोवणी मुख्यमंत्री डॉ. प्रमोद सावंत हांणी पयलींच दिल्ली. पूण, तुयेंच्या सरपंचाचो घोव दर एका कामांत हस्तक्षेप करता. मुख्यमंत्र्यान आनी पंचायत संचालनालयान तांचेर बेगोबेग कारवाय करची अशी मागणी मांद्रेकार हांणी केल्या.
फाटलीं पंदरा वर्सां हांव राजकारणांत आसां. हांव पेडणेंतल्या ओबीसीं लोकां खातीर काम करतां. पूण, अशी दादागिरी केन्नाच पळोवंक नाशिल्ली. म्हज्या वाठारांतल्या उदरगतीच्या कामां विशीं हांव सरपंच कडेन उलोवंक शकता. हातूंत तिच्या घोवाक हस्तक्षेप करपाचो अधिकार ना, अशेंय मांद्रेकारान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
