भांगरभूंय | प्रतिनिधी
फोंडें: सपनापार्क कुर्टी-फोंड्यां बांदतल्या इमारतीच्या चौथ्या माळ्या वेल्यान सकयल पडून गौरी शंकर जैस्वाल (42, मूळ उत्तर प्रदेश, सद्या रावपी बोणबाग, बेतोडें) ह्या कामगाराक मरण आयलें. ही घडणूक काल (मंगळारा) दनपारां 3 वरांच्या सुमाराक घडली. फीट आयिल्ल्यान तो इमारती वयल्यान पडिल्ल्याचो दुबाव उक्तायतात. फोंडें पुलिसांनी पंचनामो करून कूड बांबोळे हॉस्पिटलांत धाडून दिल्या.
मेळिल्ले म्हायती प्रमाण मंगळारा दनपारां इमारतीच्या चौथ्या माळ्यार गौरी शंकर जैस्वाल काम करतालो. त्या वेळार अचकीत ताची भलायकी इबाडली. हेर कामगार ताका धरपाची तयारी करीत आसतनाच ल्हवू ल्हवू फाटीं वचत आशिल्लो कामगार इमारतीच्या चौथ्या माळ्या वयल्यान सकयल पडलो. हातूंत ताका जाग्यारूच मरण आयलें.
मरण आयिल्ल्या कामगारा फाटल्यान घरकान्न आनी एक धूव आसा. फोंडेंचे उपनिरिक्षक रश्मी भाईडकार हांणी घडणुकेचो पंचनामो केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
