आयआयटीक लोकांनी सहकार्य करचें

भांगरभूंय | प्रतिनिधी

सुभाष फळदेसाय: सांग्यार सप्तकांत 10 ते 15 कामांचो जाता शुभारंभ

सांगें: सांगें मतदारसंघांत दर एका सप्तकांत धा ते पंदरा कामांचो शुभारंभ जायत आसा. ह्या मतदारसंघांत आयज खूबशे प्रकल्प येतात, पूण आयआयटी सारको गोंयचे नदरेंतल्यान म्हत्वपूर्ण शिक्षणीक प्रकल्प मुख्यमंत्री डॉ. प्रमोद सावंत हांणी सांग्यार दिला. ते खातीर लोकांनी ह्या प्रकल्पा खातीर सहकार्य करपाची गरज आसा अशें समाज कल्याण मंत्री सुभाष फळदेसाय हांणी सांगलें.

वाडें-सांग्यार कॉम्युनिटी हॉलाची बुन्याद घाले उपरांत ते उलयताले. ह्या वेळार तांचे सयत सरपंच, पंच वांगडी आनी गांवचे लोक हाजीर आशिल्ले. तांणी एकाच दिसांत कोर्टाली हांगा राखणे वणत, दोपोडें गांवांत कॉम्युनिटी हॉल, वाड्यार कॉम्युनिटी हॉल आनी बांदा कुशीक राखणे वणत अशा कामांची सुरवात केली.

संजिवनी साकर कारखानो बंद पडिल्ल्यान शेतकारांनी ऊसाचें पीक घेवपाचें बंद केलां. जाल्यार कांय कडेन बंद पडपाच्या मार्गार आसा. हाका लागून शेतकारांची परिस्थिती बिकट जाल्या. ते खातीर कारखनो परतून सुरू करपाची गरज आसा. ह्या विशयाचेर दोन तीन बसकाय घेतल्यात अशें तांणी म्हणलें.

सांग्यार प्रदुशण मुक्त उद्देग हाडपाचे यत्न चालू आसात. पयलीं खूब अश्यो उद्देग कंपनी आयिल्ल्यो, पूण फाटल्या पांच वर्सांत खंड पडलो. जेन्ना उद्देग येतात तेन्ना ताका विरोध करतात. ते खातीर वातावरण दुशीत जाता. बऱ्या कामा खातीर जावपी विरोध बंद जावक जाय अशें सुभाष फळदेसाय हांणी सांगलें.

तांणी मुखार उलयतना म्हणलें. सांगें मतदारसंघांत एका वर्सांत 150 कोटींचे प्रकल्प उबे रावतले. तातूंत कृशी भवन, जिल्हो हॉस्पिटल, गोरवां वैजकी हॉस्पिटल हांचो आस्पाव आसा. गोरवां वैजकी हॉस्पिटला खातीर चार हजार चौमि सुवात संपादीत केल्या.

केंद्र सरकारा कडेन सांग्यार एक परिपूर्ण हॉस्पिटल जावचें अशी उलोवणी केल्या. तेच बरोबर उदका स्रोत खात्याची इमारत आनी हॉस्टेल, ट्युरिझम खातें आनी ट्युरिझम कॉर्पोरेशन हांचे वतीन 20 कॉटेजीस आमी एका वर्सांत तयार केल्यात, आनी आनीक 20 कॉटेजीसचे प्रस्ताव धाडून दिल्यात अशें फळदेसाय हांणी म्हणलें.

सांग्यार सात पंचायती मदल्या स पंचायतींच्यो इमारती सरकारान बांदून दिल्यात. उरिल्ल्या एका पंचायतीची इमारत रोखडीच उबी जातली अशी म्हायती ह्या वेळार मंत्री सुभाष फळदेसाय हांणी दिली.