भांगरभूंय | प्रतिनिधी
मडगांव, प्रतिनिधी: दक्षीण गोंयच्या लोकांक बर्यो भलायकी सेवा मेळच्यो म्हणून दक्षीण गोंय जिल्हो हॉस्पिटलांत सुविधा उपलब्ध करपाची मागणी केल्या. राज्यांतल्या भलायकी मळार राज्य सरकार लक्ष दिना हाची उच्च न्यायालयान दखलूय घेतल्या. तेच सुनावणे कडेन जोडिल्ली एक याचिका न्यायालयांत दाखल करतले, अशें गोवा फाॅरवर्ड अध्यक्ष विजय सरदेसाय हांणी सांगलें.
दक्षीण गोंय जिल्हो हॉस्पिटलाच्या विशयाचेर उलयतना सरदेसाय हांणी, हॉस्पिटलांत ट्रामा युनीट, आयसीयू सारकिल्ल्यो सुविधा नाशिल्ल्यान दुयेतींक मनस्ताप सोंसचे पडटात. लोकांक जीएमसींत वा खाजगी हॉस्पिटलांनी वच्चें पडटा. लोकांच्या ह्या विशयाचेर दक्षीण गोंयांतल्या मुखेलपणान साश्टीच्या लोकांनी एकठांय येवपाची गरज आसा. पूण ह्या विशयाक जितलें म्हत्व आसा तें लोकां मेरेन पावना , तशेंच राजकारणूय बरेंच जाल्ल्यान हो विशय पयस वता. कांय आमदार पयलेच फावट वेंचून आयल्यात. तांणी लोकांचें विशय घेतल्यार फुडेंय ते वेंचून येतले. ह्या विशयाचेर विरोधी आमदारांचो एकवट नाशिल्ल्यान आमी न्यायालयांत वचपाचो निर्णय घेतिल्ल्याचें सरदेसाय हांणी सांगलें.
दक्षीण गोंय जिल्हो हॉस्पिटला कडेन आडनदर जाता. ताचें खाजगीकरण करपा खातीर ताचे कडेन कोणूच लक्ष दिना? काय सरकारा कडेन फावो तो निधी ना. ही म्हायती लोकांक मेळप गरजेचें अशें सरदेसाय हांणी म्हणलें.
विधानसभेंतली आस्वासनां पुराय करचीं: सरदेसाय
दक्षीण गोंय जिल्हो हॉस्पिटलांत आयसीयू ना, न्युरोसर्जन ना. आपात्कालीन वेळार दुयेतींक हॉस्पिटलांत धाडटात. विधानसभेंत हाचेर चर्चा जाली तेन्ना मंत्री सगळ्यो समस्या सोडटले अशें आस्वासन दिल्लें. ते प्रमाण रितीं पदां भरल्यार, गरजेच्यो सुविधा सुरू केल्यार हो प्रस्न सुट्टलो. राज्य सरकार ह्या प्रस्ना कडेन कित्याक आडनदर करता हाची म्हायती ना. पूण हे विशीं सरकारा कडेन चर्चा करतले, अशेंय सरदेसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
