भांगरभूंय | प्रतिनिधी
आमदार सरदेसाय हांची पळोवणी करपाची मागणी
मडगांव, प्रतिनिधी: एसजीपीडी लागसारा उबारिल्ल्या बायोमिथेनेशन प्रकल्पांतल्यान कशे तरेन प्रदूशण जाता हाची पळोवणी गोंय प्रदुशण नियंत्रण म्हामंडळान करची. घाणयारें उदक उक्ताडार सोडिल्ल्यान ह्या प्रकरणाचो परतून आढावो घेवन हो प्रकल्प खरेंच सुरू आसा काय हाची पळोवणीय जावची अशी मागणी फातोड्डेंचे आमदार विजय सरदेसाय हांणी केली.
एसजीपीडीएच्या मार्केटा लागसारच्या ५ टिपीडी बायोमिथेनेशन प्रकल्प उबारला. आमदार सरदेसाय हांणी नगरसेवकां सयत सोमारा ह्या प्रकल्पाची पळोवणी केली.
सोलापूराच्या प्रकल्पाची पळोवणी करपा खातीर गेल्ले कडेन थंय मात्तूय घाणयारो वास मारिनाशिल्लो. पूण जेन्ना फातोड्डेंच्या ह्या प्रकल्पाची पळोवणी करपाक आयिल्ले कडेन घाणयारो वास आयिल्ल्यान हो प्रकल्प खरेंच सुरू आसा काय ही पळोवणी करपाची गरज आसा. प्रक्रिये उपरांतचें घाणयारें उदक उक्ताडार सोडटात. प्रकल्पाचें ऑडीट जावपाक जाय. ह्या प्रकल्पा वरवीं निर्माण जावपी लायटीचो कोणा खातीर वापर जाता हाची चवकशी करपाची गरज आसा. प्रकल्पाक लागून जावपी प्रदुशणाक लागून लोकांचे भलायकेचो प्रस्न निर्माण जाता. फकत प्रकल्प उबारपा खातीर जागो घेतला. हो सगळो फटींगपणा करपाचो यत्न चालू आसा, असो गंभीर आरोपूय सरदेसाय हांणी केला.
नगरनियोजन खात्या सयत दक्षीण गोंय जिल्हाधिकारी कार्यालयान ह्या प्रकल्पाची पळोवणी करची. मंत्री आनी सरकारान ह्या प्रकल्पाची गंभीर दखल घेवची अशीय मागणी सरदेसाय हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
