भांगरभूंय | प्रतिनिधी
शॅक धनयांनी आमदार मायकल लोबो सयत घेतली मुख्यमंत्र्यांची भेट
पणजी, प्रतिनिधी : परंपरिक नुस्तेमारांच्या जाग्याचेर शॅक घालपाक आराखडो निश्चित केल्यान शॅक धनी परतून बेजार जाल्यात. शॅक घालपा खातीरचो आराखडो सदोश आसा, असो आरोप भाजपाचे आमदार मायकल लोबो हांणी केला. ताचेर भासाभास करून तोडगो काडपाक मुख्यमंत्री डॉ. प्रमोद सावंत हांणी बुधवारा बसका आपयल्या. आमदार लोबो हांणी ही म्हायती दिली.
पर्यटन खाते आनी पर्यावरण खाते हांचे मदी मात्तूय समन्वय ना. अधिकारी सारकें काम करीनात देखून शॅक आराखड्यांत घुस्पागोंदळ जाला. ऑक्टोबर अर्दो सोंपलो तरी अजून शॅक वांटप जायना. हाका लागून अंदुं पसून शॅकांक उशीर जातलो. हातुंत शॅक धनयांचें वेवसायिक लुकसाण जाता, अशे आमदार लोबो हांणी सांगलें.
परंपरिक नुस्तेमारांच्या जाग्याचेर आमी शॅकां घालूंक नात, अशे शॅक धनी संघटनेचे अध्यक्ष क्रुझ कार्दोज हांणी सांगलें. मुख्यमंत्री सावंत हांकां आमी आराखड्यांतलो घुस्पागोंदळ सांगला. उपाय काडपाक तांणी बसका आपयल्या. सांवतावाडो हांगाचे शॅक काडून गौरावाडो हांगां घाल्यात. हाका लागून गोंदळ वाडला, अशे तांणी सांगलें.
शॅक वांटप जाले उपरांत कन्सेट टू ऑपरेट परवानो घेवचो पडटलो. हाका कळाव जातलो. मुख्यमंत्र्यांनी हस्तक्षेप केल्यार शॅक बेगीन सुरू जातले. हाचेर तांणी तोडगो काडचो, अशी मागणी जाता. चार्टर विमानां येवपाक लागिल्ल्यान विदेशी पर्यटक येवपाक सुरवात जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
