भांगरभूंय | प्रतिनिधी
मडगांव: संवसारीक अन्न दिसाचे फाटभुंयेर स्ट्रीट प्रोव्हायडर्स, फूड बँक सांगोल्डें, नवतारा हॉटेल हांचे वतीन शॅडो कावन्सिलाच्या पालवान मडगांवच्या नितळसाण कामगारांक जेवणाचें वांटप केलें. कोयर संकलनांतल्यान लोकांची भलायकी बरी उरपा खातीर वावुरपी कामगारांक गरजेच्यो सुविधाय संबंदीत प्रशासना कडल्यान मेळच्यो अशी मागणीय केली.
मडगांवां हॉटेल नवताराचे कुशीक अन्नदानाची कार्यावळ जाली. ह्या वेळार शॅडो कावन्सिलाचे साविओ कुतिन्हो, जॉन बाप्तीस्ट, नौनम खान, रोझलीन परेरा, कार्लोस ग्रासियस, नीक कुलासो, स्नेहल ओंसकार, जुझे मारिया मिरांडा आनी हेर मानेस्त हाजीर आशिल्ले.
ह्या वेळार मडगांव पालिका वाठारांतलो कोयर उबारप आनी संकलन करपी कामगारांक सुमार 450 जेवणाचे डबे वितरीत केले.
साविओ कुतिन्हो हांणी सांगलें की, कोयराक लागून खूबशीं दुयेंसां पातळपाची शक्यताय आसता. आपणे केल्लो कोयर संकलीत करून तो उबारपाचें काम कामगार करतात. ताका लागून लोकांची भलायकी बरी उरपा खातीर तांचो मोटो सहभाग आसा. तांचे प्रती आदर व्यक्त करपा खातीरूच संवसारीक अन्न दिसाचे फाटभुंयेर तांकां जेवणाचें वांटप केलें.
सोनसड्या वयल्या कोयर प्रकल्पांतल्या 40 कामगारांकूय थंय वचून जेवणाचे डबे दिले. ह्या वेळार उदकाच्यो बाटल्योय व्हेल्ल्यो. हे सुवातेर उदकाचें कनेक्शन अजूनय सारकें केल्लें ना. ताका लागून हातपांय धुवपा खातीर तशेंच पियेवपा खातीरूय कामगारांक अजूनय उदक घेवन वचचें पडटा. हो प्रस्न बेगीन सोडोवपाची मागणी साविओ कुतिन्हो हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
