भांगरभूंय | प्रतिनिधी
डॉ. प्रमोद सावंत: 1600 कोटी खर्च करून गोंयांत भुंयगत वीज वाहिन्यांच्या कामाक मेळटली गती
दिवचल: संवसारांत आधुनीक तंत्रज्ञाना प्रमाण जायत आशिल्लो बदल लक्षांत घेवन गोंयांत सुमार 1600 कोटी रुपया खर्च करून भुंगयत वीज वाहिन्यांचें जाळें विणून अखंडीत वीज पुरवण दिवपाचो सरकाराचो संकल्प आसा. तेच बरोबर वीज वेवस्थेंत गोंय स्वयंपूर्ण करपाचो ध्यास घेतना कोयर, वारो, सूर्य, उदका पसून वीज निर्मिती करपाचो सरकाराचो संकल्प आसा. ते खातीर दरेकान योगदान दिवचें. सोलर वीज निर्मिती खातीर सरकार विशेश आग्रही आसा. हाका लागून विजे बाबतींतूय गोंय स्वयंपूर्ण आत्मनिर्भर करपाची येवजण फळादीक जातली असो विस्वास मुख्यमंत्री डॉ. प्रमोद सावंत हांणी उक्तायलो.
कारापूरा भुंयगत वीज वाहिन्यो घालपाच्या कामाचो शुभारंभ केले उपरांत ते उलयताले.
गोंय सरकार लोकांक नेमान वीज उपलब्ध जावची हे खातीर विशेश यत्न करीत आसा. गोंयची वीज पुरवण सगल्यांत सवाय दिवन वीज बचत करपा बरोबरूच सगल्यांनी सोलर वीज निर्मितीक प्राधान्य दिवन आत्मनिर्भर जावपाचो संकल्प करपाची गरज आसा. उद्देग तशेंच दरेक घरांत नेमान पुरवण जावची हे खातीर नवे तंत्र वापरतात. ताका लोकांच्या सहकार्याची गरज आसा अशें तांणी म्हणलें.
हेर राज्यां प्रमाण गोंयांत लोड शेडींग हो प्रकार ना. पूर्ण वेळ वीज दिवपाचो यत्न आसता. अशें आसून लेगीत तमनार प्रकल्पाक विरोध जालो. लोकांच्या सहभागांतल्यानूच विकास प्रक्रिया मुखार वता. उद्देगांक विजेची गरज आशिल्ल्यान ह्या प्रकल्पाक विरोध करचो न्हय अशें डॉ. प्रमोद सावंत हांणी म्हणलें.
फाटल्या 60 वर्सांत केंद्रान केन्नाच व्हड प्रमाणांत निधी दिलो ना. पूण मोदी सरकारान देशभरांत आनी गोंयाक व्हड प्रकल्प दिले. ताका लागून गोंयची उदरगत सुरूच आसून लोकांचो मोग सदांच भाजपा बरोबर आसूं दी अशें मुख्यमंत्र्यांनी म्हणलें.
कारापूर शांतादुर्गा देवूळ वाठारांत आयोजीत कार्यावळींत वीज मंत्री सुदिन ढवळीकार, आमदार प्रेमेंद्र शेट, महेश सावंत, सरपंच दत्तप्रसाद कारखंडे, ऊर्जा सचीव अजीत रॉय, मुख्य अभियंतो स्टिफन फर्नांडीस, आरती बांदोडकार, शंकर चोडणकार, दया कारबोटकार, पंचायत वांगडी बी मानेस्त हाजीर आशिल्ले.
सुदिन ढवळीकार हांणी म्हणलें गोंयांत वीज वेवस्थेंत सुदारणा करतना 60 वर्सां पोरणी आशिल्ले वीज वेवस्थेंत सुदारणा करपाची येवजण आसा. भुंयगत वाहिन्यांक लागून गांवगिऱ्या वाठारांत जावपी समस्या पयस जातली. केंद्र सरकारान वीज सुदारणे खातीर व्हड निधी उपलब्ध केला. लोकांनी सहकार्य करपाची गरज आसून कांय लोकांच्या फटीच्या प्रचाराक बळी पडून दरेक गजालींक आनी प्रकल्पांक विरोध करपी मनशांच्या मानसीकताये पसून सादूर रावचें.
ह्या वेळार आमदार प्रेमेंद्र शेट हांचेंय उलोवप जालें. चोडणां भुंयगत वीज वाहिन्यो प्रकल्पाची बुन्याद मंत्री सुदिन ढवळीकार हांचे हस्तुकीं घाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
