भांगरभूंय | प्रतिनिधी
नागपूर, खबरां संस्था: नागपूर समृद्धी म्हामार्गाचो पयलो टप्पो (शिर्डी, नागपूर) लोकां खातीर सुरू जाल्ल्याक कांय म्हयनेच जाले. पूण हो म्हामामार्ग विवीध अपघातांक लागून चर्चेंत आसता. दर सप्तकाक थंय एकतरी भिरांकूळ अपघात जाताच. शेनवार १४ ऑक्टोबराक रातच्या वेळार समृद्धी म्हामार्गाचेर परत एक फावट अपघात जावन हातूंत ६ वर्सां पिरायेच्या एका भुरग्या सयत १२ जाणांक मरण आयलें. बुलढाण्या कडल्यान नाशिकाक वचपी खाजगी टॅम्पो ट्रॅव्हलरान रस्त्या कुशीक आशिल्ल्या एका ट्रकाक धपको दिलो. तो इतलो नेटाचो आशिल्लो की १२ जाणांक जाग्यारूच मरण आयलें. ह्या अपघातांत २३ जाण जखमी जाले. ह्या टॅम्पो ट्रॅव्हलरांत ३५ प्रवासी आशिल्ले.
सगळे प्रवासी नाशीक जिल्ह्यांतले. ते बुलढाण्यांत बाबा सैलानींच्या दर्शनाक गेल्ले.
मजगतीं, घडणुके सुवातेर थळाव्यां वतीन मजत कार्य सुरू आशिल्लें. ह्या अपघातांत जखमी जाल्ल्या २३ प्रवाशांक छत्रपती संभाजीनगरच्या हॉस्पिटलांत दाखल केल्यात. टॅम्पो ट्रॅव्हलराच्या चालकाक न्हिद आयिल्ल्यान हो अपघात जाल्ल्याचें कांय जाणांनी सांगलें. जाल्यार जखमी प्रवाशांनी दावो केला, की पुलिसांनी एका ट्रकाक आडोवन दवरिल्लो. तो रस्त्या कुशीक उबो आशिल्लो. ट्रक चालक थंयच्यान ट्रक काडटना फाटल्यान आयिल्ल्या टॅम्पो ट्रॅव्हलरान फाटल्यान धपको दिलो. पुलिसांनी आजूनय ह्या अपघाता विशीं अधिकृत म्हायती दिवंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
