अस्तुरे विशींच्या लिखाणाची निती जाय

भांगरभूंय | प्रतिनिधी

तुजे खबरेक, लिखाणाक कोंकणीचो वास येता अशें वरिश्ठ पत्रकार चंद्रकांत घोरपडे केन्नाय म्हाका म्हण्टाले. तेन्ना हांव फकत हांसतालें. साडेतीन दसकांतले पत्रकारितेंतली आमची अडेच दसकांची पत्रकारिता गोमन्तक दिसाळ्यांतल्यान पत्रकारितेच्या मुखेल प्रवाहांत व्हरपी. ते खातीर आयज एकादरे कोणीय तुज्या लिखाणांत मराठी उतरां दिसतात अशेंय म्हणपी आसतले. एक गजाल खरी गोंयचो निरोप घेतना घोरपडे सरांनी म्हाका एकच सांगिल्लें, तूं हे भांगरभुंयेंतले पत्रकारितेंतच राव. तुवें गोंय सोडून वच्चें न्हय, तुजी पत्रकारिता तुजेच भांगरभुंयेंत व्हड जातली.
तांच्या सांगण्यान पत्रकारितेच्या विंगड विंगड पांवड्यार फुडें वतना पुरस्कार, इनामांय मेळ्ळीं चडशीं उसरां. हक्क सांगूंक नासतना जेन्ना पुरस्कार, भोवमान मेळ्ळे तेन्ना नमळायेन ते घेतले. दिसाळ्यांतली पत्रकारिता शिकयतल्यांक, मुखार वचपाक तेंको दिवपी संपादपी गुरूंक सलाम. राजकारण्यांक, समेस्तांक, पत्रकार भावा, भयणींक ते पुरस्कार ओंपतना आमीय ज्येश्ठांचे वळेरेंत पावलीं. भांगरभूंय दिसाळ्यांत स्तंभलेखन करतना आमचे कोंकणी दिसाळ्यांतले गुरू चंद्रकांतबाब केणी हांच्या नांवान दवरिल्लो स्तंभलेखन पुरस्कार मेळप म्हजे खातीर म्हत्वाचें. पुरस्काराची घोशणा जातकीच खूब आदीं तो तुका मेळपाक जाय आसलो अश्यो भावना उकतावपी साबार मेळ्ळे. तातूंत जाणट्यां वांगडा नेणटेय आशिल्ले. पुरस्कारां परस आमचे खातीर वाचपी म्हत्वाचो.
दिसाळीं डिजिटल जातात तेन्ना वाचपी डिजिटल मुडांत वतात. पयलीं पासून दिसाळीं हातांत घेवन वाचतल्यांक दिसाळें दारांत जायच. डिजिटलांतय तेंच, दिसाळ्यांतय तेंच दिसतकीच दिसाळें बंद करचें दिसता. अशा वेळार वाचकांक डिजिटल, ऑनलायन नवें कितें तरी दिवपाक नवी टीमय जाय. भोव-माध्यमी कामगारांक शिक्षण, प्रशिक्षण नासल्यार किजिलां वाडटलींच. गोमन्तक दिसाळ्यांतलीं किजिलां सोडोवपांत पत्रकार सुभाष कृष्णा नायक हांचो व्हड वांटो आसा. राष्ट्रीय खेळा सर्ती लागीं येतात तेन्ना तांची, खेळां पत्रकार संघटणेचे वांगडी सतिश नायक, ज्योवितो लॉपिस, शरद नायक, वामन प्रभू, किशोर पेटकार हांची याद जाता. अडेज दसकां गोमन्तकांत खबरांकार, खेळां बातमीदार आनी संपादपी, वृत्त संपादपी, वेवस्थापक सुभाष उपरांत व्हिज्युअल मिडिया, केंद्रीय मंत्र्यांचें मिडिया विशींचें कामकाज करपी. तांचो तीन दसकांचो पत्रकारितेंतलो वावर विसरूंक येना. खेळा पत्रकार संघटणेचे संस्थापक वांगडी, अध्यक्ष, सरचिटणीस म्हणुनूय तांची वळख.
कालची आनी आजची पत्रकारिता खूब वेगळी, काल आनी आयजय कश्ट आसात. तेन्ना संपर्काच्यो सुविधा नाशिल्ल्यो पूण खबरो अचूक, वेळार मेळटाल्यो. दिसाळ्यांक विस्वासार्हताय आशिल्ली. सोशल मिडिया, व्हिज्युवल मिडिया, डिजिटल मिडिया, प्रिण्ट मिडियाच्या आजच्या युगांत सगळेच खबराकांर, संपादपी जावपाक धांवतात. कांय संपादपीय मायक घेवन ज्युनियरांच्या बराबरीन, फाटल्यान आसतात तेन्ना लिखाणाक वेर वता, सृजनशिलता फाटीं पडटा. समाजांत नकारात्मकता वाडटा. चुकी जातकीच माफी मागली नाजाल्यार बोवाळ जाता, चॅनेल, पानां धांपचीं पडटात, आवाजय शेळेता तेन्ना ज्येश्ठ पत्रकार परतून
क्रियाशील जावन जायात जागे, जायात जागे म्हणत व्हय?
निती अनितीच्यो काणयो वाचकांक सांगतना मनाची खोलाय पत्रकार तपासतात? एक झाड मोडटना दुसरीं झाडां लायलीं म्हणून जावचीं ना, तांची जतनाय घेवपाक जाय. चवथो खांबो, खांब्यांनी बांदिल्ल्यो संघटणा कोसमेतना गोंयची पत्रकारिता अती वेवसायीकतेंत घुसमट्टा, लागणूक विसरता, जाती कातीचें राजकारण पत्रकारितेंत वाडत आसा, सत फट तपासनात, एकामेकां कडेन उलयनात तेन्ना ज्येश्ठ ओगी रावतले?
अनैतीक वेवसायांतले अस्तुरेक बाई (शाळेंतली शिक्षिका न्हय) म्हणप ना, तिका महिला, अस्तुरी म्हणात अशी मार्गदर्शिका सर्वोच्च न्यायालय न्यायीक यंत्रणे पासत करता तेन्ना समेस्तांक राजकी पक्ष, माध्यमांनी ती आपणावपाक जाय. मिडिया विशींचे कायदे बदलतात ते विशीं मुखेल माध्यम संघटणा काळखांत रावतात, ज्येश्ठांनी बडी मारून, सांगून सुदारणा जायना, ज्येश्ठांक मान (आदर) मेळना तेन्ना ज्येश्ठांक आपली अस्मिताय, संघटणात्मक कुशळटाय दाखोवची पडटली. पयलींचे हांसपा खेळपाचे दीस गेले, शिस्तीन खबरो दिवप, मुलाखती घेवपय उणे जाता. समाजीक बदलां प्रमाण पत्रकारितेंत वेवसायीकता व्हडा प्रमाणांत येतना समाजमन शेणचें ना हे जतनाये पासत शिटकावणी ज्येष्ठ, वरिश्ठ दीत? कुशळटायेचें, शिस्तीचें, नितीचें, नेमावळीचें शिक्षण पत्रकारांक पुस्तकांनी मेळ्ळें तरी तेंपा प्रमाण तातूंत बदल जाल्यात?
राष्ट्रीय शिक्षण निती बदलता तेन्ना पत्रकारिता शिक्षण कुशळटाय अभ्यासक्रमांत येवपाक जाय. पत्रकारितेची नेमावळ, कोंकणी, मराठी, हिन्दींतल्यान दिसाळीं, माध्यमां खातीर विशयां प्रमाण तयार करप गरजेचें. पत्रकार, लेखक मुकेश थळी भांगरभूंय दिसाळ्यांतल्यान माध्यमां खातीर उतरावळ दिवपाचो वावर करतात. ते उतरावळीचो लाव सरकारी माध्यमांकय जावचो हे खातीर मान्यताय मेळोवपाचे येत्न जाय. विज्ञान, तंत्रगिन्यान, भलायकी, सांस्कृतीक, खेळां, राजकी, साधनसुविधा, कायदो पत्रकारितेची उतरावळी खातीर, संशोधनात्मक लिखाणा पासत ज्येश्ठांचो आदार मेळूंक शकता. पत्रकारांची नवी पिळगी गोंयांतच घडटली जाल्यार ज्येश्ठांचें बळ जाय.
सांस्कृतीक प्रतिनिधी म्हणून नामना जोडिल्ल्यो कवी, लेखक ज्येश्ठ पत्रकार लीना पेडणेकार, देविका सिक्वेरा, पॅमेला डिमेलो हांकां सलाम. पत्रकारितेंतली नवी स्त्रीशक्ती भोव- माध्यमांत येतना तिचे खातीर खासा येरादारीची वेवस्था आसा? 33 टक्के अस्तुरी राखीवतेचेर खासा माध्यम कृतीसत्रां जावचीं. गोंयच्या माध्यम क्षेत्रांतले अस्तुरेचो नियाळ सरकारान घेवचो, माध्यमां खातीर अस्तुरे विशींच्या लिखाणाची निती जाय.

सुहासिनी प्रभुगांवकार
9881099260