भांगरभूंय | प्रतिनिधी
झाडांचे बरे वाडी खातीर, तांकां घटाय हाडपाक वा तीं अदीक फळादीक जावपाक तांकां उदका वांगडाच साबार पोशक तत्वांची गरज आसता. फॉस्फरस, पोटॅशियम, कॅल्शियम सारकिल्ले धातू तांचे वाडी खातीर गुणकारी थारतात. साबार किटकनाशकां, सारीं, रसायनां जीं आमी बाजारांतल्यान हाडटात, तींच पोशक तत्वां बायोऍन्जायम्सां वरवीं आमी घरा कडेन लेगीत तयार करूंक शकतात. भाजीपालो, फळांच्यो साली, फुलांच्यो पाकळ्यो, गोड, उदक आदी वापरून, विरजण प्रक्रियेंतल्यान तयार केल्लें सारें म्हणल्यारूच ‘बायोऍन्जायम’.
बायोऍन्जायम्सांचे दोन मुखेल फायदे म्हणल्यार, रांदचे कुडींतल्या कोयरांतल्यान, पयशे खर्च करिनासताना झाडां खातीर सारें तयार जाता तशेंच घरच्या कोयराचीय विलेवाट बरे रितीन लागता. बायऍन्जायम्सांक ‘मॅजीक पोशन’ अशें म्हणटात, कारण बायोऍन्जायम्स झाडाची अन्न तयार करपाची, म्हणल्यारूच फोटोसिंथेसीसाची प्रक्रिया सुदारतात, मातयेक अदीक पिकाळ करपाक आदार करतात आनी फुलां-फळां टवटवीत तशेंच रसरशीत करतात.
बायोऍन्जायम्स किटकनाशकांचेंय काम करतात. फकत झाडां खातिरूच न्हय तर तांचो वापर आयदनां घासपाक, जमीन पुसपाक तशेंच बेसीन धुवपाक लेगीत जावं येता. कांय गजाली काळजीपुर्वक लक्षांत दवरून ही प्रक्रिया करत जाल्यार बायोऍन्जायम घरा तयार करप खूब सोंपें. ही प्रक्रिया करपाक साहित्य लागता तें म्हणल्यार उदक, गोड आनी रांदचेकुडींतलो कोयर. देखीक भाजीपालो, फळांच्यो साली आदी. ह्या साहित्याचो प्रमाण 1:3:10 असो आसप म्हत्वाचें. देखीक जर आमी 1 भाग गोड घेतात जाल्यार 3 भाग फळांच्यो, भाज्यांचो साली आनी 10 भाग उदक घेवप. रुंद वा व्हड तोंड आशिल्ली प्लास्टीकाची बाटली निवळ धुवन घेवन 1:3:10 ह्या प्रमाणान सगळी सामग्री ते बाटलेंत घालून धांपणें घट्ट बंद करून घेवचें. धांपणें बंद करतकूच बाटली घरांत चड उजवाड पडनाशिल्ले सुवातेर दवरची. बायोऍन्जायम करपाचे प्रक्रियेंत तयार जावपी गॅसाक लागून बाटली फुटपाची शक्यताय आसता देखून ग्लासाची बाटली वापरप टाळचें. विरजण प्रक्रियेक सुमार 3 म्हयने लागतात. पयल्या म्हयन्यांत, दर दुसऱ्या दिसाक बाटलेचें तोंड उगडून बंद करप भोव गरजेचें. अशें केल्ल्यान बाटलेंत तयार जाल्लो गॅस भायर सरता आनी तो भायल्या प्राणवायूच्या संपर्कान आयिल्ल्यान प्रक्रिया अदीक बेगीन पुराय जावंक आदार जाता. तीन म्हयन्यान पुराय सामग्री विरगळून जेन्ना बाटलेच्या तळाक जमता तेन्ना बायोऍन्जायम तयार जाता. तें मागीर एके वेगळे बाटलेंत गाळून काडचें. अशे तरेन घरगुती सारें तयार जाता. झाडां खातीर तें वापरताना 1 लिटर उदकांत 20 मि.ली. मिसळून झाडांक घालचें.
साबार तरांचे बायोऍन्जायम्स आमी घरा कडेन तयार करूंक शकतात आनी दर एकाचें आपलें खाशेलपण आसा.
केळ्यांच्या सालीं पासून केल्ल्या बायोऍन्जायमांत फॉस्फरस, कॅल्शियम सारकिल्ले धातू आसतात जातूंत झाडांचीं मुळां घट जातात. लसूण आनी कांद्याच्या सालींचे बायोऍन्जाइम किटकनाशकाचें काम करता आनी कळयांचेर वा पानांचेर तें शिंपडलें जाल्यार झाडां किड्यां पासून वाचूंक शकतात. लिंबू, मोसंबी आनी संत्रांच्यो साली घालून तयार केल्लें बायोऍन्जायम फुलझाडां खातीर बरेंच गुणकारी थारता तशेंच आयदनां धुवपाक लेगीत ताचो वापर करुं येता. गुलाब, रोजांच्या पाकळ्यां पासून केल्लें बायोऍन्जाइम झाडां बरोबरूच जमीन पुसपाक लेगीत उपेगी पडटा. ह्या मॅजीक पोशनां वरवीं घराच्या कोयराचो बरे पैकीं वापर जाता आनी झाडांची भलायकी लेगीत बरी उरपाक आदार जाता.
साईशा शेट शिरोडकार
9307250175
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
