भांगरभूंय | प्रतिनिधी
म्हापशें, प्रतिनिधी ः बारीक सारीक गजालींचेर झगडीं करप ही कैद्यांची मानसिकताय. चिकन वाडपा सारकिल्ल्या गजालींचेर झगडीं जातात. विवीध उपक्रम, उच्च शिक्षण आनी कुशळटाय उदरगत अभ्यासक्रमाची तजवीज करून लेगीत कैद्यां मदीं कसलीच सुदारणा दिसना. केन्ना तरी ही मानसिकताय बदलतली हे खातीर सरकार यत्न करता, अशें मुख्यमंत्री डॉ. प्रमोद सावंत हांणी सांगलें.
पेडें- म्हापशेंच्या भाऊसायब बांदोडकर खेळां मैदानाची पळोवणी करपा खातीर मुख्यमंत्री आयज आयिल्ले. ह्या वेळार ते पत्रकारां कडेन उलताले.
कोलवाळ बंदखणीक आपणें भेट दिल्या. आदले परस आतां हांगा खूब कितें सुदारलां. पूण कैद्यांची मानसिकताय सुदारपाचो आमी यत्न करतात. ताका लागून तांकां मुक्त सोडप, कामां करप, विवीध प्रयोग जशे योग करप, प्रार्थना म्हणप सारकिले उपक्रम चालू आसात. फाटल्या वर्सा सावन विवीध कुशळटाय विकास अभ्यासक्रम सुरू जाल्यात. कुशळटाय विकासा वरवीं कैद्यांची मानसिकताय सुदारपाचे यत्न सुरू आसात अशें मुख्यमंत्र्यान फुडें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
