सुर्ला चक्री वादळ : सुमार देड लाखांचें लुकसाण
भांगरभूंय | प्रतिनिधी
दिवचल, प्रतिनिधी : दिवचल म्हालांतल्या सुर्ला पंचायत विभागांतल्या विंगड विंगड सुवातांचेर बुधवारा सकाळीं घोग्यांनी पावस आनी चक्रीवादळ जालें. ह्या वादळांत खुबशीं झाडां लायटिच्या सरयांचेर आनी तीन वाहनांचे पडून सुमार एक ते देड लाखांचें लुकसाण जालें. भामाईकर वाडो, मडकयकार वाडो तशेंच हेर सुवातांचेर ह्या वादळाचो फटको बसलो.
दिवचल उजो पालोवपी दळाचे अधिकारी राहुल देसाय, उपजिल्होधिकारी शिवाजी नायक हांच्या मार्गदर्शना खाला जवानांनी सुमार पांच वरां मजत कार्य करून खुबश्या सुवातांचेर पडिल्लीं झाडां, लायटीचे खांबे, सरयो काडल्यो. तशेंच सुमार पांच लाखांची मालमत्ता वाटयली. ह्या वादळांत कोणाक कांय जावंक ना.
ह्या वादळांत दोन ट्रकांचेर झाडां पडून लुकसाण जालें. तशेंच एक स्विफ्ट गाडयेर व्हडलें झाड पडून लुकसाण जालें. नेटान वारो आयिल्ल्या हांगच्या कांय घरांचे नळेय उडून गेले.
मुख्यमंत्री डॉ. प्रमोद सावंत हांणी लुकसाणेचो आढावो घेतलो आनी मजत करपाचे आदेशूय दिले. ह्या वादळांत लुकसाण जाल्ल्यांक अर्थीक मजत दिवपा खातीर सगळे तरेचे यत्न करतले, अशें मुख्यमंत्र्यान सांगलें.
सरपंच विश्रांती सुर्लकार आनी पंचायत वांगड्यांनी लुकसाण जाल्ल्या वाठाराची पळोवणी केली. तलाठ्या वरवीं लुकसाणेचो आढावो घेतिल्ल्याचें सरपंचान सांगलें.
ह्या वाठारांत जाल्ल्या खुबश्या सुवातांचेर लायटीचे खांबे आनी लायटीच्यो सरयो तुटून पडिल्ल्यान लुकसाण जालें. ताका लागून हांगा लायटूय नाशिल्ली. आयजूय वीज खात्याचे कर्मचारी आनी अधिकारी लायटीचें काम करताले अशें पंच सुभाष फोंडेंकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
