आश्व्यां गांज्याची लागवड; एकल्याक अटक

भांगरभूंय | प्रतिनिधी

पणजी: केंद्रीय नार्कोटीक कंट्रोल ब्युरोच्या (एनसीबी) गोंय फांट्यान आश्वें हांगा धाड घालून ड्रग्स बाळगिल्ल्या प्रकरणांत रशियेचो आदलो पुलीस अधिकारी आंद्रे डिमियान हाका अटक करून व्हड प्रमाणांत ड्रग्स जप्त केल्लो. दुबावीत रावत आशिल्ले कुडीचेर व्हड प्रमाणांत गांज्याची लागवड केल्ल्या प्रकरणांत घर धनी क्लिफर्ड डिसोझाक अटक केल्या.

एनसीबीच्या गोंय फांट्यान एप्रील 2023 वर्सा हरमल आनी मांद्रें हांगा धाड घालून आंतरराष्ट्रीय ड्रग्स तस्करांक उक्तडार हाडिल्लें. तातूंत एनसीबीन रशियेची पेंवपा खेळगडी आनी ऑलिम्पिकांत रुप्यां पदक जैतिवंत स्वेतलाना वार्गानोव्हाला (39) रशियेचो आदलो पुलीस अधिकारी आंद्रें डिमियान (45) आनी थळावो तरणाटो आकाश म्हाड्डोळकार ह्या तिगांक अटक केल्ली. तांचे कडल्यान 30 लाखांचे विवीध प्रकारचीं घुंवळे वखदां जप्त केल्लीं.

हरमल दर्यादेग वाठारांत आंतरराष्ट्रीय ड्रग्साचो पंगड कार्यरत आसून हो पंगड विदेशी नागरिकांक ड्रग्साची पुरवण करीत आशिल्ल्याची म्हायती एनसीबीक मेळिल्ली. ते प्रमाण एनसीबीच्या पंगडान गुप्तहेरांचे मजतीन स्वेतलाना वार्गानोव्हाला हिका 13 एप्रील 2023 दिसा अटक केली. उपरांत 28 एप्रील दिसा फांतोडेर आकाश म्हाड्डोळकार ह्या तरणाट्याक अटक केल्ली. ताचे जबानी वयल्यान एनसीबीन 28 एप्रील दिसा सांजवेळा आश्वें सावन आंद्रें डिमियान हाका अटक केल्ली. ह्या वेळार एनसीबीन आंद्रें डिमियाना कडल्यान पयलीं 20 एलएसडी ब्लॉटस् हो ड्रग्स जप्त केल्लो. उपरांत एनसीबीन तो रावत आशिल्ल्या कुडीची झडटी घेतली तेन्ना 1.32 ग्राम वजनाच्यो 59 एलएसडी ब्लॉटस्, 8.8 ग्राम कोकेन, 16.49 ग्राम हाशील तेल, 210 ग्राम चरस, 410 ग्राम हॅस केक जप्त केल्ले.

तशेंच आंद्रें हाणें ते सुवातेर गांज्याची लागवड करीत आशिल्ल्याची म्हायती मुखार आयली. उपरांत व्हरांड्यांतल्यान 1.440 कील गांज्याची रोंपा जप्त केल्लीं. तशेंच ताचे कडल्यान लॅपटॉप, मोबायल, 4.60 लाखांचें भारतीय चलन, 1,829 अमेरिकन डॉलर, 1,720 थाय बाहत हें थायलंडचें चलन, दोन पासपोर्ट आनी बनावट कागदपत्रां जप्त केल्लीं. उपरांत एनसीबीन वयल्या दुबावितां आड घुंवळे वखदां विरोधी कायद्याच्या विवीध कलमां खाला गुन्यांव दाखल करून अटक केल्ली.

एनसीबीन ह्या प्रकरणाची अदीक चवकशी केली तेन्ना, आंद्रें डिमियान हो आदलो रशियन पुलीस अधिकारी आसून तो 2008 वर्सा गोंयांत आयले उपरांत तो आश्वें हांगा एकाच कुडींत रावत आशिल्ल्याची म्हायती मुखार आयली. ह्या काळांत ताणें गांज्याची लागवड करून तशेंच व्हड प्रमाणांत ड्रग्साची तस्करी केल्ल्याची म्हायती मुखार आयली.

वयले सुवातेर आंद्रें डिमियान हाका आलाशिरो दिल्ल्याचें तशेंच व्हरांड्यांत गांज्याची लागवड करपाक मेकळीक दिल्ल्याचे पुरावे मुखार आयले उपरांत एनसीबीन घर धनी क्लिफर्ड डिसोझा हाका अटक केल्या. अटक केल्ल्या डिसोझाक पेडणेंच्या पयलो वर्ग न्यायालयान न्यायालयीन कोठी दिल्या. मजगतीं डिसोझान न्यायालयांत जामीन अर्ज दाखल केला.