भांगरभूंय | प्रतिनिधी
अभिजित प्रभुदेसाय, मुर्डी- खांडेपारा जाली बसका
फोंडें, प्रतिनिधी : मुर्डी – खांडेपारा जमावबंदी लागू करून बांदाचें काम चालू आसा. तें उदक एका उद्देजकाच्या स्टील प्रकल्पाक दिवपाक सरकार धडपडटा. भूतखांबार स्टील प्रकल्प उबारल्यार केरी, वळवय, वेरें- वाघुर्में, खांडेपार आनी उसगाव पंचायत वाठारांतलो उदकास्रोत पूर्ण आटून वतलो. सैमाची राखण करपाक मुर्डी आनी सोनारबाग गांवांतल्या प्रकल्पाक विरोध जाता तो फुडले पिळगे खातीर उपेगी थारतलो. बांदा संबंदी राष्ट्रीय हरित लवादा कडेन जाप मागपाची आमी तयारी केल्या, अशी म्हायती रेनबॉ वाॅरियर्सचे अभिजित प्रभुदेसाय हांणी आयतारा रातीं मुर्डी -खांडेपारा जाल्ले बसकेंत दिली.
भुतखांबार जावपी स्टील प्रकल्पाक लागून केरी, वळवय आनी वेरे – वाघुर्मे पंचायत वाठारांतल्या उदकास्रोत आनी सैमाचें लुकसाण जातलें. पुर्वजां पसून भूतखांब पठार गांवा खातीर म्हत्वाचो भाग थारला. दूदसागर न्हंयेचेर जावपी प्रकल्पाक थळाव्यांचो विरोध आशिल्ल्यान सरकारान जमावबंदी लागू करून बळयां कामाक सुरवात केल्या. जमावबंदीची प्रक्रिया फकत एका दिसा भितर केल्या. सर्वोच्च न्यायाल्याच्या आदेशा प्रमाण सरकार अशे तरेन जमावबंदी लागू करून जबरदस्तीन प्रकल्पाचें काम सुरु करपाक शकना. प्रकल्पा आड आमी उच्च न्यायालयांतूय वतले अशें प्रभुदेसाय हांणी सांगलें.
सरकारान दूदसागर न्हंयेचेर वट्ट १८ बांद उबारल्यात. ताका लागून कांय वर्सां सावन हुंवार येवपा सारक्यो घडणुको घडटात. मुर्डे उबारिल्लो बांद सैमाचें लुकसाण करतलो. गांवगिर्या वाठारांतल्या लोकांचो मातये कडेन संबंद आशिल्ल्यान सरकारान लोकांचो विरोध भायरावन प्रकल्प सुरु करप चुकीचें, अशेंय प्रभुदेसाय हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
