भांगरभूंय | प्रतिनिधी
मडगांव, प्रतिनिधी: नावेलेचे रोझरी चर्चींत प्रार्थनेक गेल्ल्या भाविकांच्या दुचाकीच्यो डिक्की उघडून भितरलें सामान चोरपाच्यो घडणुको फाटल्या कांय दिसां सावन जातात. सोमारा लोकांनी एकल्याक धरून मडगांव पुलिसांच्या ताब्यांत दिलो. हे विशीं कोणेंच कागाळ करूंक ना. पुलीस दुबाविताची चवकशी करतात. सामाना वांगडा दुचाकीय चोरयेक गेल्यात.
सोमारा सकाळीं साडेआठ वरांचेर चर्चींत प्रार्थने खातीर आयिल्ल्या भाविकांच्या दुचाकी गाडयांच्यो डिक्की उक्त्योच आशिल्ल्यो. एका जाण्ट्या मनशा कडेन कांय चावयो आशिल्ल्याचें नदरेक पडलें. लोकांनी ताका धरलो आनी पुलिसांचे सुवादीन केलो. हे चोरयेंत कोणाचो हात आसा हाची चवकशी सध्या पुलीस करतात.
हे व्यक्तीन पयलींय गाडयेंतल्यान सामान चोरलां. ताचेर पुलिसांनी खर कारवाय करची, अशी मागणी लोकांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
