भांगरभूंय | प्रतिनिधी
भांगरभूंय । प्रतिनिधी
पोरणे गोंयः चवथीची परब सोपले उपरांत भोमचे लोक रस्तो रुंदिकरणाक विरोध करपा खातीर परत तयार जाल्यात. आयतारा थळाव्या लोकांनी श्री नागझर देवळा कडेन एकठांय येवन ताका गाराणे घालून आंदोलन निर्णायक पांवड्यार व्हरपा खातीर येश दिवपाची मागणी ताचे लागीं केली. तांणी भोमा गांवांत 15 ऑक्टोबराक सांजे 4 वरांचेर जाहीर सभा घेवपाचें आनी पुराय गोंयांतल्यान रस्तो रुंदिकरणाक विरोध करपा खातीर येवपाचें आवाहन केलां.
राजकारण्यांक बरी बुद्ध दिवची अशें आमी आमच्या थळाव्या देव आनी राखणदारां कडेन मागलां. हे सुवार्थी राजकारणी आमकां उबंतर वडोवपाक तयार जाल्यात. आमकां जे त्रास जातात ते विशीं सत्ताधाऱ्यांक जागें करात अशें आमी देवा लागीं मागलां अशें संजय नायक हाणे पत्रकारांक सांगलें. विरोधी पक्ष आमदारांच्या फुसलावणेन रस्तो रुंदिकरणाच्या प्रश्नांत राजकीय रुप दिवपाचो यत्न भोमकार करतात ह्या सत्ताधाऱ्यांच्या विधानाचो भोमकारांनी निशेध केला.
आमी सत्ताधाऱ्यां कडेन तशेंच थळावो आमदार गोविंद गावडे हाचे कडेन गेले मात तांणी आमकां कसलोच तेंको दिलो ना. ताका लागून आमकां विरोधी पक्षांतल्या आमदारा लागीं वच्चे पडले अशें नायक हाणे स्पश्ट केलें. ह्या भाजपा सरकाराक गोंयकाराचें कांय पडून गेल्ले ना. बिगर गोंयकारां खातीर हे सरकार वावुरता असो आरोप नायक हाणे केला. समान प्रश्नांचेर सरकाराक विरोध करपा खातीर 15 ऑक्टोबराक साबार लोक एकठांय येतले अशे ताणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
