भांगरभूंय | प्रतिनिधी
भांगरभूंय । प्रतिनिधी
पेडणेः पेडणेकारांक विस्वासांत घेनास्तना शेज जमीन वसाहत वसणुकेंत घालपाच्या सरकाराच्या प्रस्तावाक विरोध करपाक फुडें सरल्ल्या सरकाराक विरोध करपा खातीर पेडणेकारां मदी एकवोट जावपाक लागला हें आयतारा भाऊसाहेब बांदोडकार गार्डन वाठारांत आयोजीत केल्ल्या जाहीर सभेंत दिसून आयलें. सरकारान विभागांत बदल करपाचें सोडून दिवचें ना जाल्यार सोमार उपरांत आमी खर आंदोलन करतले अशी शिटकावणी मांद्रेचो आमदार जीत आरोलकार हाणे परत एक फावट पेडणेकारां वतीन सरकाराक दिल्या.
हे सभेंक आदले केंद्रीय मंत्री आनी मांद्रेचो आदलो आमदार रमाकांत खलप, राजकी पक्षाचें थळावे फुडारी, वेगवेगळ्या पंचायतीचें सरपंच आनी पंच वांगडी आनीस साबार लोक व्हडा संख्येन हाजीर आशिल्ले. सोमार मेरेन ह्या प्रश्नाचेर निर्णय घेवपाचें उतर मुख्यमंत्र्यांनी दिल्लें. पेडणेकारांची जमीन विभाग बदल रद्द करपाच्या फावराद तांणी निर्णय घेतलो ना जाल्यार आमी जाहीर केल्ल्या प्रमाण आंदोलन सुरू करतले अशें आरोलकार हाणे जाहीर केलें. झोनिग आराखडो रद्द करता, विश्वजीत राणे हाका मंत्रिमंडळान काडून वडयता अश्यो घोशणा लोकांनी दिल्यो.
आपले विशीं कोणेय कितें फटीची वावडी पातळ्ळी, आरोप, अन्याय केलो तरी तो हांव खपोवन घेतलो मात मांद्रे मतदारसंघांतल्या लोकांचेर अन्याय करपाक कोणूय फुडें सरलो जाल्यार तें आपूण केन्नाच सहन करचो ना. मुख्यमंत्र्यान आमका आस्वासन दिलां त्या प्रमाण ताणे निर्णय घेवन पेडणेकारांक उबंत वडोवपाचो जो कट केलां तातूंतल्यान तांकां साल्वार करचें असें आरोलकारान सांगलें.
मांद्रे मतदारसंघातल्या जे कोण आमदार, मंत्री जाले तांणी जमीन विभागणी बदलाक विरोध करपा खातीर एकठांय येवपाक जाय अशें मांद्रचो सरपंच अमित सावंत हाणे सांगलें. विश्वजीत राणे हाची जायती प्रकरणा लोकांक खबर आसात. दोंगर वाठरांतली जमीन कित्या खातीर वसणूक विभागा खाला हाडटात हें लेगीत लोकांक खबर आसा अशें ताणे सांगलें. विश्वजीत राणे आनी ताचो समर्थक आशिल्ल्या आदल्या आमदारान मांद्रेत सभा घेवंन दाखोवची अशें आव्हान सावंत हाणे दिलां.
जे तरेन विभाग बदलपाचे यत्न चल्ल्यात ते पळयल्यार दिल्लीतल्या वेवसायिकाचें आनी रियल इस्टेटवाल्याचे कल्याण करपाचेंच हें काम आसा अशें दिसता अशें सागून रमाकांत खलप हाणी आंदोलनाक आपलो पुराय तेंको जाहीर केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
