भांगरभूंय | प्रतिनिधी
मडगांव, प्रतिनिधी ः गुजरातांतल्या अहमदाबाद शारांतल्या शाहीबाग पुलीस स्टेशनांत दोन नेण्ट्या चलयां सयत एक बायल आनी एक दादलो बेपत्ता जाल्ल्याची कागाळ केल्ली. कोंकण रेल्वे पुलिसांनी आयज ह्या चवगांक मडगांव स्टेशनांतल्यान ताब्यांत घेवन शाहीबाग पुलिसांच्या ताब्यांत दिलीं.
हिरलबेन भरतभाई कानुंगा आनी नीलेश शर्मा आनी दोन नेण्ट्यो चलयो बेपत्ता जाल्यात अशी कागाळ आशिल्ली. गुजरात पुलिसांक जवगूय जाणां अहमदाबाद रेल्वे स्टेशनांतल्यान गोंयां वचपी गाडयेंत बसल्यांत, अशें कळ्ळें. ही म्हायती तांणी गोंय पुलिसांक दिली. मागीर कोंकण रेल्वे पुलीस निरिक्षक सुनील गुडलर हांच्या मार्गदर्शना खाला रेल्वे स्टेशनाचेर पुलीस दवरले. इतलेंच न्हय तर गुजरातांतल्यान येवपी दरेक गाडयांनी सोद चालू केलो.
उपनिरिक्षक आयेशा म्हामल, मुखेल हवालदार सत्यवान नायक, हवालदार समीर शेख, निलेश पागी, रोशनी चौधरी हांणी तांचो सोद घेवन चवगांकूय ताब्यांत घेतलीं. उपरांत ही म्हायती शाहीबाग पुलिसांक दिली. ते प्रमाण गुजरात पुलिसांनी येवन तांका ताब्यांत घेतलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
