बाणास्तारी न्हंयेंत दर्यादेग पुलिसांची धाड
भांगरभूंय | प्रतिनिधी
चार बोटी, 8 ट्रक आनी सांठयल्ली रेंव मेळून 2 कोटींचो म्हाल जप्त
पणजी, प्रतिनिधी ः बाणस्तारी पुला लागसार न्हंयेंत बेकायदेशीर रेंव काडपी 14 जाणांक पुलिसांनी आयज सकाळीं अटक केली. ह्या न्हंयेंत बेकायदेशीर रेंव काडटात अशीं म्हायती दर्यादेग पुलिसांक मेळ्ळी. उपरांत पुलिसांनी धाड घालून बेकायदेशीर रेंव काडपा आड कारवाय केली. ह्या प्रकरणांत रेंव भरिल्ल्यो चार बोटी, 8 ट्रक आनी सांठयल्ली रेंव मेळून 2 कोटींचो म्हाल जप्त केला.
पुलीस निरीक्षक नवलेश देसाय आनी अजित उमर्ये हांच्या फुडारपणा खाला उपनिरिक्षक भिका नायक, सहाय्यक उपनिरिक्षक कार्लुस पाँटिस, मुखेल हवालदार सखाराम गांवकार, सूर्यकांत बोर्डेकार, हवालदार लैलाधर गावडे, देवदत्त शिरवईकार, योगीराज चोडणकार, आयआरबी मुखेल हवालदार रजनीकांत गावडे, महेश खरवत हांणी धाड घालून तांकां अटक केली.
14 जाणां आड वेगवेगळ्या कलमां खाला गुन्यांव नोंद केलां. पुलिस उपअधीक्षक सुदेश नार्वेकार हांच्या फुडारपणाखाला निरीक्षक अजित उमर्ये फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
