भांगरभूंय | प्रतिनिधी
म्हापशें मुख्याधिकाऱ्या कडल्यान आदेश; 30 दिसांची मुजत
म्हापशें: म्हापशें पालिकेन दिल्ल्या आदेशांत सिटी मार्केट नांवाच्या प्रकल्पांत उबारिल्ले 40 गाळे वजा दुकानां आनी शेड येता त्या 30 दिसां भितर संबंदितांनी स्वता जावन मोडची नाजाल्यार पालिका मातये भरवण करतली अशें म्हणलां.
पालिकेची परवानगी घेनासतनाच 40 स्टॉल्स आनी शेड वजा हो प्रकल्प उबारिल्ल्याची कागाळ पालिके कडेन फाटल्या 2021 वर्सा दाखल जाल्ली. हे कागाळीच्या आदारान तेन्नाचे मुख्याधिकारी अमितेश शिरवयकार हांणी फाटल्या 27 सप्टेंबर दिसा हो आदेश जारी केला.
म्हापशें पालिका अधिकाऱ्यांनी वयले सुवातेची पळोवणी केली तेन्ना पेत्रोल पंपा कुशीचे सुवातेंत 40 स्टॉल्स आनी शेड्स उबारिल्ल्याचें दिसून आयलें. हे खातीर ट्यूब, पायपां आनी सिमेंटाचो वापर केला. ते प्रमाण म्हापशें पालिकेन फाटल्या 17 फेब्रुवारी 2021 दिसा गोवा पालिका अधिनेम कलम 184(8) खाला कारवाय कित्याक करची न्हय अशा अशायाची कारणां दाखय नोटीस दिवन स्टॉलांच्या धनयांक जाप दिवपाचे निर्देश दिल्यात. तशेंच धनयांक वैध कागदपत्रां सयत वैयक्तीक सुनावडे खातीर हाजीर रावपाचे निर्देश दिल्ले.
पूण ह्या धनयांनी कसलीच जाप दिली ना. तशेंच वैयक्तीक सुनावणे वेळार संबंदीत संरचणुकेच्या कायदेशीर रितीच्या समर्थनार्थ कसलींच कागदपत्रां सादर करपाक अपेशी थारल्यात.
ह्या प्रकरणाची सुनावणी घेतले उपरांत मुख्याधिकार्यांनी चलता क्रमांक 5/1 पीटी शीट क्र. 162 मदले हे 40 स्टॉल्स आनी शेड काडून उडोवपाचे निर्देश दिल्यात. नोटीस मेळिल्ले सावन 30 दिसां भितर हाची अंमलबजावणी करपाक पालिकेन मुजत दिल्या. नाजाल्यार पालिका स्वता जावन हें बांदकाम मोडून उडयतली आनी ते खातीर येवपी खर्च संबंदितां कडल्यान वसूल करतली अशे ह्या आदेशांत म्हणलां.
फाटल्या नोव्हेंबर 2021 वर्सा ह्या मार्केट प्रकल्पांतल्या गाळ्यांक पालिकेन कुलप लावपाची कारवाय केल्ली. पूण पालिका संचालनालयान ही कारवाय चुकीची थारायिल्ल्यान 24 वरां भितर पालिकेक दुकानांचे कुलप काडचें पडिल्लें. सद्या हें प्रकरण मुंबय उच्च न्यायालयाच्या खंडपिठांत न्यायप्रविश्ठ आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
