भांगरभूंय | प्रतिनिधी
मडगांव: वार्का दर्यादेगेर भोंवपा खातीर आयिल्ले बंगळुरूंतले स पर्यटक न्हावपा खातीर दर्यांत देंविल्ले. दर्याचें व्हडलें ल्हार आयले उपरांत सवूय पर्यटक उदकांत बुडूंक लागले. दृष्टी मरिनाच्या जिवरक्षकांनी बुडपी पर्यटकांक उदका भायर काडले आनी लागींच्या हॉस्पिटलांत व्हेले.
मेळिल्ले म्हायती प्रमाण बंगळुरूंतलीं दोन बायलां आनी चार दादले असो स जाणांचो पंगड पर्यटना खातीर वार्का दर्यादेगेर आयिल्लो. दनपारां 12.30 वरांचेर ते न्हावपा खातीर दर्यांत देंविल्ले. दर्याच्या व्हड ल्हाराचो अदमास येवंक नाशिल्ल्यान पर्यटक उदकांत बुडले आनी तांच्या नाकांत आनी तोंडांत उदक गेलें.
दृष्टी मरिनाच्या जिवरक्षकांनी रोखडीच घडणूक थळार धांव घेवन सवूय पर्यटकांक उदका भायर काडले. जिवरक्षक संदेश वेळीप, गजानंद वेळीप, चंद्रेश वेळीप, संदेश गांवकार हांणी सर्फबोर्ड, रेस्कू ट्युब आनी जेटस्कीचा वापर करून पर्यटकांचो जीव वाटायलो.
ह्या पंगडांतल्या एका पर्यटकाच्या नाकांत आनी तोंडांत उदक गेल्ल्यान तो बेशुद्ध पडिल्लो. ताका रोखडोच सीपीआर दिलो आनी एम्बुलन्सीक आपोवन लागसारच्या हॉस्पिटलांत उपाचारा खातीर दाखल केलो. सद्या सगल्या पर्यटकांची भलायकी बरी आशिल्ल्याचें दृष्टी मरिना कडल्यान सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
