भांगरभूंय | प्रतिनिधी
मडगांव, प्रतिनिधी: मडगांव पालिकेंतल्या सोंपो निविदाची फायल मार्च २०२३त सांडली. हातुंतल्यान पालिकेक १ कोटींचो येणावळ फटको बसतलो. हे विशीं शॅडो कावन्सीला वतीन जिल्हो पालिका संचालनालयाक निवेदन दिलां. सांडिल्ल्या फायलीं विशीं पालिकेन पुलिशेंत कागाळ करची अशी मागणी शॅडो कावन्सीला वतीन जाल्या.
मडगांव पालिकेंतल्यो फायली अश्या कश्योय दवरप आजूनय बंद जावंक ना, असो आरोप करीत शॅडो कावन्सीलाचे संयोजक साविओ कुतिन्हो हांणी शेणिल्ले फायलीं विशीं पुलीस कागाळ करपाची मागणी केली.
साविओ हांणी म्हणलें, जुलय २०२२ सावन पालिका प्रशासना वतीन सोंपो एकठांय करपाचें काम करता. दर म्हयन्याक साडेचार ते पांच लाखांचो सोपो एकठांय करतात. ज्या कर्मचार्यांक सोपो एकठांय करपाक सांगलां तांच्या पगाराची रक्कम पांच लाखां मेरेन वता. ताका लागून पालिकेक सोंपो करांतल्यान कांयच फायदो जायना, अशें तांणी म्हणलें.
२८ फेब्रुवारी २०२३ दिसा ७६ लाखांची सोपो निविदा काडल्या. पूण तेन्ना कोणूच बोलीदार येवंक नाशिल्लो. उपरांत ती फायल सांडली. मागीर नवी निविदा प्रक्रियाय सुरू करूंक ना. पालिकेंतल्या कांय जाणांकूच निविदा जाल्ली नाका देखून ही फायल गायब जाल्ल्याचो आरोप साविओ कुतिन्हो हांणी केलो. पालिके बगर कांय जाणांचे वयक्तीक कामगार वचून सोंपो कलेक्शन करतात. ताचीय चवकशी जावपाची गरज आसा, अशी मागणी तांणी केल्या.
जिसुडा वतीन मडगांव शाराचो मुखेल आराखडो तयार करपाचें काम सुरू आसा अशें समजता. शाराचो मुखेल आराखडो तयार केल्यार तातूंत थळाव्या नागरिकांचो, समाजसेवकांचो इनपुट आसपावपाची गरज आसा. पूण तें घडना, मडगांवच्या नगराध्यक्षानय हे विशीं आपल्याक खबर ना अशें सांगलां. देखून मडगांव शाराचो मुखेल आराखडो तयार करतात जाल्यार नागरिकांच्योय सुचोवण्यो घेवच्यो अशी मागणी साविओ कुतिन्हो हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
