भांगरभूंय | प्रतिनिधी
पणजी, प्रतिनिधी ः सुर्ला- सत्तरीची विद्यार्थीनी भाग्यश्री देऊ पिंगळे (17) हिचेर बुधवारा सकाळीं शाळेंत वतना वांस्वेलाच्या (अस्वल) दोन पिलांनी हल्लो केलो. हातूंत भाग्यश्रीचे तोंडाक आनी पांयांक घावे जाल्यात. ही घडणूक रान खात्याच्या गेटी पासून 20- 30 मीटर अंतराचेर घडली.
पर्येंचे उच्च माध्यमीक शाळेंत भाग्यश्री शिकता. सदां भशेन बुधवारा सकाळीं ६.३० ची बस धरपाक ते आपली आजी आनी भयणी वांगडा चलत घरांतल्यान भायर सरलें.
भाग्यश्री फुडें चलताले आनी फाटल्यान भयण आनी आजी येताली. तेच वेळार वांस्वेलांनी तिचेर हल्लो केलो. तांचे वांगडा आनीक दोन पिलां आशिल्लीं. भाग्यश्रीच्या तोंडाक आनी पांयाक घावे जाल्यात. ही घडणूक पळोवन भाग्यश्रीचे आजयेन आड्डपाक सुरवात केली. तिचो आवाज आयकून गेटी वयले दोन रानां कामगार थंय आयले. तेन्ना वांस्वेलाचीं तीं पिलां थंयच्यान पळून गेलीं.
हे घडणुकेची म्हायती मेळ्ळ्या उपरांत वाळपयच्या रान अधिकाऱ्यांनी घडणुक सुवातेर भेट दिवन भाग्यश्रीची चवकशी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
